Los uèlhs e los caps tretzistas èran virats aqueste divendres 27 de novembre del costat de l’estadi d’Hull FC ont se debanava a pòrtas barradas e pel primièr còp la finala d’una sason de Superliga bravament trebolada. Los Dragons Catalans èran tenguts en resèrva fins a dijòus per disputar la finala en cas qu’una de las doas formacions qualificadas poguèsse pas jogar en rason de qualques tèstes positius al coronavirus. Foguèt pas lo cas: la partida opausèt plan los primièrs dos del classament, Wigan e Saint Helens.

Superliga: los pals causisson lo campion
 
Una finala qu’es un vertadièr dèrbi: pensatz, 16 quilomètres separan Wigan de Saint Helens! Foguèt pas la partida de las grandas envoladas. A la pausa, St Helens menava 2-0: e òc! una sola penalitat coma punts marcats en 40 minutas! Las defensas an tengut còp. Cal esperar la 65a minuta per veire un ensag: un còp de pè contrat e Jake Bibby marca l’ensag, la transformacion d’Hardaker tusta lo pal e passa pas: Wigan mena 4-2. Novèla penalitat per Saint Helens e egalitat a 4 pertot. Hardaker manca una penalitat. Lo compte de las darrièras segondas s’acaba quand una temptativa de tombat dels Sants tòca lo pal de dreita dels Roge e Blanc, la pauma rebomba dins l’en-but e lo centre Jack Welsby capita de pausar la man sus ela, just abans la linha de balon mòrt e abans lo defensor de Wigan: St Helens es campion: 8-4!
 

 
 
Wigan, sabètz ont se trapa?
 
Legeires d’aquesta cronica, me cal saludar vòstras coneissenças geograficas aquesidas mercé al seguit de la sason tretzista: sabètz plan ont se trapa Wigan. Es pas lo cas del scenarista de la sèria televisada César Wagner sus France 2 ont, dins l’episòdi programat aqueste 27 de novembre, un personatge declara, a prepaus d’un jove fotbolaire que deviá signar a Wigan, d’un aire desdenhós: “Wigan, vous savez où c’est, vous? (Wigan, sabètz ont se trapa, vos?)”. E quin piòt! Sèm en dever de demandar una educacion tretzista per totes los autors de scenaris televisats o cinematografics: qu’espandiscan lo camp de lors coneissenças geograficas e esportivas!
 
 
Elèit 1: Lesinhan es d’ataca
 
Una sola partida èra al programa de la jornada de ratrapatge en Elèit 1. Aqueste dissabte, Avinhon recebiá Lesinhan. Lo club de Corbièras a aculhit son pilar australian Wesley Lolo (sus la pelena, tres jorns aprèp son arribada!) e va probablament faire signar lo pilar dels Dragons: Sam Moa que son contracte al club catalan es pas renovelat.
 
Lesinhan comença fòrt, marca tres ensages e mena 16-0 al cap d’un quart d’ora, mas Avinhon fa son retard e torna a 18-20 just a la pausa. Los provençals prenon l’avantage 22-20, mas la maquina audenca se torna metre en marcha e signa tres ensages suplementaris. Sus la còrna, un ensag transformat permet als Bisons de prene un meritat punt de bònus defensiu: 40-28.
 
Per aquesta primièra dimenjada de decembre, una jornada completa de campionat es prevista (jos resèrva…) amb las oposicions: Dragonets-St Gaudenç; Palau-Carcassona; Albi-Vilanòva; Lesinhan-Tolosa e Avinhon-Limós.
 
Per las autras competicions, la federacion a bon espèr de las relançar lo 1r de febrièr dins un format en cors d’elaboracion.
 
 
 
 
Alan Roch

 




 

 
Illustracion
St-Helens es tornarmai campion de la SuperLiga!