An anonciat “la nòva escritura completa” del polemic article 24 de la lei dicha “de seguretat globala”, après una reünion de crisi tenguda aqueste diluns al palais de l’Elisi a l’entorn del president francés, Emmanuel Macron, amb los representants dels grops parlamentaris d’LREM, del Modèm e d’Agir. Aquesta lei, e mai que mai son article 24, qu’enebís de prene d’imatges dels policièrs en accion, a entraïnat de nombrosas protèstas per tot l’estat francés e l’an contestada amb fermetat de jornalistas, de fotografes, d’organizacions umanitàrias e politicas, de sindicats...
 
“Aquela nòva redaccion [de l’article 24] serà conducha dins l’encastre d’un trabalh collectiu dins los tres grops parlamentaris de la majoritat”, çò a declarat Christophe Castaner, cap del grop LREM a l’Assemblada Nacionala francesa, entornejat de sos omològs del Modèm, Patrick Mignola, e del grop Agir, Olivier Becht. “Es pas un retirament ni una suspension mas una rescritura totala del tèxt”, çò a precisat.
 
De lor caire, los partits d’esquèrra LFI e PCF contunhan de reclamar la supression pura e simpla de la proposicion de lei. Quant a la drecha, LR assegura que “l’executiu e sa majoritat van d’error en error”, en apondent que la rescritura de l’article “depend desenant del Senat” ont lo tèxt deu en principi èsser examinat en genièr. Quant a l’extrèma drecha, l’RN a ironizat que “rescriure un article ja votat es original coma metòde”.
 
 
Darmanin defend la polícia a l’Assemblada Nacionala
 
De vèspre, lo ministre de l’Interior, Gérald Darmanin, compareguèt davant los deputats de l’Assemblada Nacionala francesa, ont reconeguèt que “benlèu” i aviá “de problèmas estructurals” al sen de la polícia e listèt los “sèt pecats capitals” del còrs, dont la formacion, lo material, l’enquadrament, o l’inspeccion generala de la polícia (IGPN), dicha “la polícia de las polícias”.
 
Ça que la, Darmanin defendèt son estacament a l’article 24 e a la proteccion dels policièrs. Tanben reïterèt sa fisança en lo prefècte de polícia de París e avalorèt que “i a pas de divòrci entre la polícia e sa populacion”.
 

Des individualités ne font pas un tout. Je ne supporte pas et je ne supporterai pas que l’on porte atteinte à l’institution, aux policiers et aux gendarmes, qui font un travail admirable et dont je rappelle que samedi, 98 d’entre eux ont été blessés. pic.twitter.com/1ulfMzUZ9t

— Gérald DARMANIN (@GDarmanin) November 30, 2020

 
 
 
Una brutala agression racista
 
De soslinhar que mentre que tot l’Exagòn protestava contra aquela lei que penaliza l’enregistrament e la difusion d’imatges de la polícia, de camèras de seguretat enregistrèron a París una brutala agression racista de quatre policièrs contra lo productor musical, Michel Zecler.
 
E mai los quatre policièrs sián suspenduts, la difusion dels imatges de l’agression a aumentat l’indignacion ciutadana contra la dicha lei.
 

Michel, un producteur de musique, a été tabassé par trois policiers samedi dernier à Paris. Ils l’ont ensuite accusé à tort d'avoir voulu prendre leurs armes et de rébellion.

Mais les policiers ignoraient une chose : tout a été filmé. pic.twitter.com/PTo71fzJzP

— David Perrotin (@davidperrotin) November 26, 2020