Un tribunal d'Hong Kong a fach empresonar los activistas pròdemocracia Joshua Wong, Agnes Chow e Ivan Lam, que son estats condemnats a de penas d’entre 7 e 13 meses de càrcer per aver organizat e participat a una protèsta non autorizada. Las condemnacions arriban dins l’encastre de l’aplicacion de la lei chinesa de seguretat nacionala, facha per reprimir tota mena de dissidéncia dins l’èx-colonia britanica.
 
Los tres activistas son estats declarats colpables de dirigir, far la crida e participar a una protèsta qu’entornegèt lo sèti de la polícia a Hong Kong.
 
En çò que tanh a Joshua Wong, de 24 ans, es lo quatren còp que l’encarceran, après que venguèt un simbòl del movement pròdemocracia pendent la Revolucion dels Parapluèjas de 2014.
 
La jutgessa Lily Wong a soslinhat lo nivèl de planificacion de la protèsta e lo ret que se generèt mejançant Telegram per cridar los manifestants. E mai aja reconegut que s’agiguèt d’una protèsta pacifica, a afirmat que “lo tribunal deu ramentar l’importància de protegir l’òrdre public”.