Me sortiguèt de ma boita coma una masca giscla de sa tuta. M’acroquèt a sas aurelhas: la de drecha, una aurelheta fuèlha, passida, fronzida, rafida; la de senèstra, una aurelhassa cogorla amb de botiòlas. Pudissián, pudissián aquelas aurelhas, avián pas degut veire passar lo sabon de Marselha dempuèi mai d’un mes talamai que pudissián!
 
E vos parli pas del menton. I a lo menton avançaire, reculaire, montaire, davalaire que vira d’un caire, que vira de l’autre. Ieu, tombèri sus un menton doble. Menton doble galochaire. Vos disi pas coma aquel menton me tibava las elasticas. Èran prèstas a ne petar!
 
Pegavi a la gauta drecha. Gauta conflada, conflada coma una bofiga, prèsta a bofigar. Pegavi a la gauta senèstra cobèrta de botons mas pas de botonets, non! De botonasses!
 
Podètz pas saber lo nombre de potons que mandèt per procuracion amb de pòtas, confladas, coloradas de roja. De roje viu. Rouge volupté. Aqueles escupits de potons me colorèron de roge!
 
E parlem pas de l’alen! Podètz pas saber çò qu’es de suportar, al ras de boca, un alen d’alhet que pudís. E puèi entre dos alens, de ròts. De rotasses portaires d’odors de civet de lèbre, d’aigardent de pruna. Entre dos ròts, posquèri ausir un pet e sentir un aire de marihuana.
 
E se botèt a corrér e se botèt a bofar... a bofar coma lo vent del miègjorn. Ieu faguèri: avança, recuòla. Avança, recuòla al ritme del bofadís. Bofava... escupissiá! Talamai qu’èri trempa. Trempa coma una sopa.
 
Quora foguèt enraumassada, vos disi pas! D’esternudals aquí ne’n vòs, aquí n’as! Del còp, baissavi, davalavi. Aürosament que cada doas minutas, dos dets me tornavan montar!
 
De longa barbotissiá, barbotissiá: “M’emmasca aquela masqueta! N’ai mon cofle! La te vau escampar!”
 
Que vau devenir?
 
Benlèu acabarai dins l’estomac d’una balena?
 
 
 
 
Clamenç

 

---

Partejatz lo confinament amb la rèsta de legeires

Encoratjam nòstres legeires a nos mandar de tèxtes, de vidèos, d’imatges o d’àudios sus lors idèas de passar lo confinament. De partejar aqueles moments entre totes nos ajudarà a nos donar d’idèas los unes als autres, e nos coneisserem un pauc melhor.
        
     
                                                                                                                                                                                                                                                                                                                                                                                         

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires.             As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale...              Convivéncia e paratge en confinament.