Ongria ven d’enebir lo maridatge e l’adopcion d’enfants als parelhs omosexuals. Lo parlament ven d’aprovar una reforma constitucionala que limita lo concèpte de familha a sa version mai conservatritz, çò es als parelhs formats per doas personas de genres diferents. Los emendaments aprovats establisson dins la Constitucion ongresa que “la maire es una femna, lo paire es un òme” e mai que “lo maridatge es l’union d’una femna e d’un òme”. E mai s’establís que sonque los parelhs maridats pòdon adoptar d’enfants. Fins ara, las personas non maridadas i podián tanben accedir.
 
La majoritat absoluda del partit ultranacionalista Fidesz a impausat los emendaments, e mai l’iniciativa amodèsse las protèstas de la comunautat LGBTI e de las organizacions pròdreches umans. L’associacion Háttér, per exemple, critica que lo govèrn priorize son ideologia “nacionalcrestiana” a la possibilitat que los enfants pòscan èsser aculhits dins un ostal que los vòlga e aime. De son caire, Amnestia Internacionala assegura dins un comunicat qu’es “una jornada sorna per Ongria”.
 
Aquelas mesuras omofòbas arriban doas setmanas après l’interpelacion d’un eurodeputat del Fidesz a Brussèlas dins una orgia gaia en mancant a las mesuras anticovid e en portant de dròga. Per l’oposicion, aquel escàndol a mes en question las valors del Fidesz e es un exemple de son “ipocrisia politica”.