De penas de quatre ans de preson, doas penas de 30 ans e la perpetuitat pels 14 acusats d’èsser complices dels terroristas dels atemptats contra la redaccion de Charlie Hebdo e un supermercat cashèr en genièr de 2015 a París, qu’assassinèron 17 personas. La senténcia se rendèt publica dimècres de ser. Las penas pus duras son per dos dels tres acusats que son recercats.
 
Segon lo jutge president del tribunal, la causida “tan precisa” de las victimas, qu’èran “de jornalistas o de membres de las fòrças de seguretat o de personas de fe josieva”, mòstra que “lor desir èra de semenar la terror dins los païses occidentals”.
 
Lo 7 de genièr de 2015, los fraires Said e Cherif Kouachi ataquèron la redaccion del setmanièr Charlie Hebdo. Tirèron sul mond amb un fusilh automatic AK-47 e tuèron 12 personas. Mentretant, Amedy Coulibaly assassinèt un policièr e quatre ostatges dins un supermercat cashèr. Los tres assalhidors foguèron abatuts per la polícia. Lo masèl foguèt revendicat a l’encòp per Al Qaida e per l’Estat Islamic.
 
Ara, lo procès contra los 14 complices d’aquel masèl a redobèrt un dels crimes terroristas pus crusèls de l’istòria recenta de França, a un moment ont la violéncia jihadista es totjorn a esmòure lo mond amb de crimes òrres coma l’assassinat de l’ensenhaire Samuel Paty o l’atac d’una basilica de Niça. Un moment que lo president francés, Emmanuel Macron, es a prepausar de leis per combatre çò qu’el nomena “separatisme islamic”.