A partir de dissabte passat, totes los nòus permeses de menar donats dins l’Union Europèa auràn la forma d’una carta de crèdit de plastic, amb un format europèu estandard e mai de proteccions de seguretat.

Lo nòu permés europèu remplaçarà progressivament los mai de cent modèls desparièrs, de papièr e de plastic, qu’a l’ora d’ara emplegan mai de tres cents milions de menaires dins tota l’UE.
 
Aquela mesura fa partida de l’intrada en vigor d’un ensemble mai vast de mesuras —la 3a directiva de l’UE sul permés de menar— qu’a l’objectiu de refortir la libertat de circulacion, de luchar contra la fraudariá e de melhorar la seguretat estradièra.
 
“A l’ora d’ara, las divèrsas polícias de transit d’Euròpa devon conéisser mai de cent tipes desparièrs de permeses de menar, de papièr e de plastic”, çò diguèt lo comissari europèu dels Transpòrts, Siim Kallas. Qu’apondèt: “nos cal de permeses de bon comprene, e fòrça de mal falsificar”.
 
Lo novèl permés invalida pas los existents, que los existents seràn remplaçats progressiavament al moment del lor renovelament. Lo sistèma de permés per ponches càmbia pas.
 
La directiva 2006/126/CE sus los permeses de menar foguèt adoptada pels estats membres e per lo Parlament Europèu en 2006, e es venguda plenament aplicabla lo 19 de genièr de 2013.