Bonjorn cars Homo Sapiens,
 
Me presenti. Soi Dòna Mezmaiscaia d’Adigueia e soi una femna de Neandertal.
 
Per quin miracle se fa que me retròbi davant vosautres? Pas cap, levat lo de l’excelléncia de las sciéncias russas. Soi la resulta d’un clonatge a partir de l’ADN fossil manlevat a l’òssa d’un mainatge inumat dins la cauna de Mezmaiskaya, 29 000 ans i a. Lo sit aqueste se tròba sus las ribas del riu Sukhoi, dins la pichona republica enclavada d’Adiguesia que fa partida del Crai de Krasnodar, l’anciana e mitica Circassia. Soi doncas la Dòna de Mezmaiskaya, e seguiguèri un emprenhament dins lo ventre d’una brava maire portaira Homo sapiens, una cròsmanhon coma disiam del temps dels darrièrs neandertalians. Tot s’escasèt fòrt plan, levat que mos neogenitors crentèron una naissença prematura. De fait, ma gestacion – un pauc mai braca que la vòstra – necessitèt una tsariana, version russa de la cesariana.
 
Al par de mon “edat genetica”, se pòt considerar qu’aguèsse existit en aquel temps, auriái fait partida dels darrièrs neandertalians que visquèron sus aquesta Tèrra e auriái conegut las primièras populacions de vòstra espècia vengudas envasir los territòris de mon pòble desaparegut. Mas se degun non contèsta que nòstres dos pòbles se costegèron de milierats d’annadas de temps al Pròche Orient, en Euròpa e en Asia, los estudis e los vejaires son en desacòrd sus la temporada de desparicion dels neandertalians: d’unes pensan qu’aquò remonta a 40 000 ans, d’autres a 25 000 ans. Per çò que m’atanh, me presenti davant vosautres amb un patrimòni genetic que proven de parents que cabián dins los darrièrs dels neandertalians e se pòt pensar qu’aguèron de relacions amb los representants europèus mai ancians de vòstra espècia.
 
Tornem a ma gestacion. L’idèa de clonar mon ADN e de desvolopar una PMA/ÈPA (procreacion medicalament assistida e emprenhament per autrú) comencèt tre ma descobèrta, çò que vòl dire qu’ai 21 ans, la flor de l’atge. Encapi que fau un pauc mai vièlha segon vòstres estandards perque las temporadas bèlas de la vida – gestacion, desmamatge, adolescéncia – son en mejana, un pauc mai cortas en çò nòstre, neandertalians. De fait, aquò es en çò vòstre que totas aquestas temporadas pareisson mai longas en comparason amb las espècias de grands monards e d’òmes. Vòstres antropològs parlan de neotenia, çò que vòl dire que servariatz a l’edat adulta de caractèrs juvenils de vòstres aujòls, los quals, en passar, èran tanben los dels neandertalians. E òc, partejam aqueste darrièr aujòl comun exclusiu nomenat Homo heidelbergensis, a partir del qual nòstres linhatges respectius e fraires divergiguèron 500 000 ans i a. Francament, ara que vos coneissi, e coma o atèsta la seguida d’aquesta conferéncia, a còps fasètz figura d’enfantolits de l’evolucion.
 
Tre la descobèrta de mon ADN, los scientifics russes noiriguèron lo projècte de me far tornar nàisser. Mas èran luènh de s’imaginar las polemicas que, vint ans mai tard, e alara qu’atenherai ma majoritat, anavan abrandar las contèstas a l’entorn de tot çò que concernís las tecnicas de procreacion medicalament assistida (PMA). Maissant afar qu’aquel afar de PMA per neandertalians dins vòstres mèdias quora Georges Church, professor de genetica a Harvard (Massachusetts) evoquèt aquela possibilitat a la debuta de l’an 2013. E dempuèi, las controvèrsias, a còps fèras, an pas daissat de s’amplificar non solament al subjècte d’una eventuala reconstitucion d’una femna o d’un òme de Neandertal, mas mai generalament per las societats occidentalas acaradas a l’evolucion de la familha e de lors demografias vielhassosas...
 
 


extrait revirat en occitan per Eric Astié


 

---

PICK, Pascal. Le Retour de Madame Néandertal, comment être sapiens? ed. Odile Jacob, 2020. 224 paginas. 21,90 èuros (Ebook 16,99 èuros)

 

 

fffff		fffff
	Que diriá una femna de Neandertal se tornèsse dins nòstre Mond d’uèi?   Dòna Neandertal espeliguèt gràcias al maridatge paleoantropologic d’òsses vièlhs e de la genetica. Educada dins lo secret mai bèl, se fa conéisser al moment d’una conferéncia sus la biodiversitat dins la quala s’adreiça publicament a sos fraires sapiens…   Aquesta faula filosoficoantropologica es l’escasença per Pascal Picq de nos esboçar un quadre de l’evolucion de l’umanitat en tot procedir a l’examen critic de las sciéncias e de la modernitat. Dòna Neandertal s’interròga: que pòdon portar a l’umanitat totes aquestes “progrèsses” sens comprenença de çò qu’es l’evolucion? Consternada per la pauretat de nòstres debats societals a l’entorn de l’educacion, de la procreacion o de l’environament, plaideja per una diversitat essenciala a nòstra subrevivéncia… Testimòni d’un temps qu’i coexistissián diferentas espècias umanas, nos alèrta suls risques de nòstra egemonia destruseira.   Eric Astié