Almens 15 personas mòrtas, dont 11 enfants, e mai de 20 nafradas es lo tragic bilanç d’un atemptat terrorista aqueste divendres passat. Los terroristas an fach espetar una bomba fixada a un rickshaw al mitan d’una ceremònia de recitacion de l’Alcoran dins lo districte de Gilan (província de Gazni), çò rapòrta Reuters. Aquela region patís sovent d’afrontaments entre l’armada afgana e los talibans.
 
 
De convèrsas de patz que capitan mal?
 
L’ataca arriba dos meses après que comencèron las convèrsas dirèctas de patz entre lo govèrn d’Afganistan e los representants del grop paramilitar fondamentalista islamic dels talibans; aquelas convèrsas s’entamenèron lo 15 de setembre a Al Dawha (Qatar) jos la mediacion dels Estats Units. La tòca es de metre lo ponch final a gaireben dos decennis de guèrra.
 
Dins aquelas negociacions, l’objectiu principal del govèrn afgan es la declaracion d’una alta al fuòc permanenta, mas los talibans afortisson que per eles, combatre l’administracion de Kabol, establida pels “invasors” estatsunidencs, fa partida d’una guèrra qu’arrestaràn pas.