Qualques centenats de personas, que representavan sustot las comunautats armènia, curda e grèga, manifestèron dissabte per las carrièras de Marselha, per denonciar los masèls “comeses impunament” pels estats turc e azèri dins lo Naut Karabakh e tanben en Rojava. Lo cortègi seguissiá una bandeiròla que demandava la fin dels “crimes de guèrra e contra l’umanitat” e que s’arrestèsse “Erdoğan e sas bandas de Daish”.
 
Los manifestants seguissián l’apèl del Conselh de las Coordenacions Armènias de França e del Collectiu Solidaritat Curdistan amb lo sosten de las associacions grègas, assirocaldèas e chipriòtas.
 
De remembrar qu’après un mes de guèrra, Armenia a cedit una bona part d’Artsakh a Azerbaitjan, çò qu’a indignat lo pòble armèni tant al país coma en diaspòra.