Lo govèrn britanic a pres de mesuras de confinament fòrça duras, mai que mai a Londres, per ensajar d’arrestar l’expansion de la nòva varianta del coronavirus SARS CoV-2, fòrça mai contagiosa, que l’an detectada al Reialme Unit.
 
Aquela varianta, que li dison VUI-202012/0, s’es ja espandida dins la rèsta d’Euròpa, çò qu’a obligat fòrça païses europèus d’empachar los viatges sortits o a destinacion de la Grand Bretanha.
 
Segon los expèrts que conselhan lo govèrn britanic, la nòva varianta a una capacitat d’infeccion d'un 71% superiora a la que i aviá fins ara e se situa sustot dins la vila de Londres, ont a fach créisser d’un biais inquietant lo nombre d’infeccions. Mas que sabèm d’aquesta nòva varianta del virus?
 
 
Qu’es aquò, una nòva soca?
 
Una nòva soca es una varianta del virus qu’a evolucionat en tot cambiar qualques caracteristicas. Es un procès normal de totes los virus. E mai siá pas quicòm de inquietant, si que pòt aver de consequéncias seriosas.
 
 
Sospechada d’èsser un 71% mai contagiosa
 
Lo grop consultatiu sus las menaças de virus respiratòris nòus e emergents Nervtag, que conselha oficialament lo govèrn britanic, a publicat un comunicat per anonciar qu’aquela nòva soca “se pòt propagar mai rapidament que las autras variantas”, concretament fins a un 71%. I a pas coneissença de cap d’autre cambiament. La varianta conten 23 cambiaments dins un còde genetic de 30 000 nucleotids, dont fòrça son restacats a d’alteracions d’una proteïna producha pel virus.
 
Aquò s’es verificat amb las analisis, mas tanben estatisticament, car s’es vist que dins los quartièrs ont aquela soca es predominanta i a mai de mond infectats que dins los autres. La setmana del 9 de decembre, se determinèt que lo 62% dels cases de Londres avián a veire amb la nòva varianta mentre que, tres setmanas abans, pertocava sonque lo 28% dels cases.
 
 
Vendriá Londres o de Kent a la fin de setembre
 
Susan Hopkins, de Public Health England, a explicat que divendres l’agéncia notifiquèt al govèrn l’existéncia d’aquela nòva soca e que lo govèrn britanic n'assabentèt sul pic l’Organizacion Mondiala de la Santat. Es complicat de saber quora apareguèt, mas se pensa qu’es activa tre la fin de setembre e que proven de Londres o de Kent.
 
 
Cossí es venguda mai infecciosa?
 
La preocupacion ven del fach qu’aumenta la velocitat de propagacion del virus. De fach, an pogut determinar cossí procedís aquela nòva varianta per venir mai infecciosa: amb de cambiaments de la proteïna de poncha, la partida del virus que li permet d’intrar dins las cellulas dels palmons, de la garganta e de la cavitat nasala car interagís amb un receptor nomenat ACE2. La mudacion de la proteïna de poncha sembla de melhorar la capacitat del virus per interagir amb l’ACE2 e li procura un avantatge de creissença.
 
 
Sembla pas mai mortala e los vaccins rèstan eficaces
 
E mai la nòva varianta pòsca èsser mai infecciosa, res non fa pensar que siá mai mortala, e pareis pas resistenta als vaccins o als tractaments medicals. D'efièch, los vaccins son ja estats dessenhats en prenent en compte qu’es inevitable que i aja de mudacions e en ensajant de las prevenir. La comunautat scientifica crei fòrça improbable que los vaccins foncionen pas amb aquela nòva varianta.
 
 
La distància interpersonala encara mai importanta
 
Amb aquela nòva soca la distància interpersonala es encara mai importanta e necessària perque, se lo virus se transmet mai rapidament, cal intensificar las mesuras per evitar lo contacte. Es rasonable de pensar que caldrà tornar a un confinament total se la soca s’espandís en Euròpa o arriba en cò nòstre.
 
 
Las mudacions del virus son quicòm de normal
 
Malgrat l’imatge que podèm aver a causa de qualques filmes, las mudacions d’un virus son quicòm de tot en tot normal, an pas res d’extraordinari.  De fach, dempuèi que se detectèt que lo coronavirus de la covid-19 èra passat en los umans, arunan a Wuhan, s’es identificat fòrça variantas del virus.
 
Lo sit de Science Media Center publica de reaccions dels expèrts a prepaus d’aquela nòva varianta del virus.