Lo parlament de Chile ven d’aprovar que 17 dels 155 membres de la convencion ciutadana que redigirà la nòva Constitucion del país sián d’indigènas, çò rapòrta Nationalia. Per d’unes, es un eveniment istoric que cal saludar, e mai ajan revendicat almens 24 representants. Per d’autres, aquò es pas lo biais de resòlver la question de la sobeiranetat dels pòbles originaris, e reclaman “una transformacion estructurala que resòlga los problèmas de fons e la violéncia coloniala”. A mai, los partits conservators an empedit que se reservèsse tanben una plaça pels afrodescendents.
 
Aqueles 17 membres seràn sèt mapoches, dos aimaras e, en rason d’un representant per pòbles, un rapanui, un quicoha, un atacama, un diaguita, un còla, un kaweska, un iagan e un chango. Segon lo recensament de 2017, lo 12% de la populacion chilena es indigèna, dont l’80% son de mapoches.
 
En octòbre passat, los chilens votèron a una larga majoritat de remplaçar la Constitucion actuala, redigida pendent la dictatura d’Augusto Pinochet. A mai, gaireben lo 80% dels votaires decidiguèron tanben que la nòva Constitucion foguèsse redigida solament per de ciutadans sens que i aguèsse de representants parlamentaris.
 
L’organ constituent de ciutadans aurà per sola tòca de redigir la Constitucion, e se dissolverà quand aurà acabat son prètzfach. Lo borrolhon se deurà sometre a referendum en 2022.