Fa un pauc mai d’un mes, lo papa Beneset XVI comencèt suls rets socials d’Internet amb sa primièra fiulada sus Twitter. Tre aquel moment, lo pontife n’aumentèt lo nombre de versions lingüisticas. Dimenge passat, a las lengas qu’emplegava, s’i apondèt una nòva version, sens dobte la mai originala: en latin. D’efièch, s’activèt alavetz lo compte especific @Pontifex_ln amb lo primièr comentari en latin del papa.
 
Segon l’academician italian Manlio Simonetti, “lo latin s’adapta fòrça ben a la sintèsi sollicitada pels novèls rets socials, fòrça mai que l’anglés”. Per exemple, una frasa coma “la corrupcion d’aqueles que son los melhors es òrra”, en latin s’acorchís fòrça: “Corruptio optimi pessima”.
 
E lo secretari de la nòva Acadèmia Pontifícia de la Latinitat, Roberto Spataro, considèra que “Twitter es una aisina qu’impausa una comunicacion rapida”. Dins un article del jornal oficial de la Santa Ses, L’Osservatore Romano, disiá que “lo latin ajuda a pensar amb precision e sobrietat”, en mai d’aver produsit “un patrimòni excepcional de sciéncia, sabença e fe”.