La bodega, o craba, es l’instrument emblematic de la Montanha Negra. A un moment, se creseguèt qu’aviá desaparegut dins lo grand desmembrièr de l’istòria e de las culturas popularas. Mas, entre collectatges, recèrca e prestacions musicalas, l’instrument torna prene de vam. Amb, per exemple, l’espelida d’una escòla de bodega a Vilardonèl (Aude), ont visquèt un musicaire e collectaire plan important dins lo reviscolament de la bodega, Charles Alexandre ...
Sòfia Jacques-Serano es una actritz bèla, portaira d’aqueste reviscolament: a permés e obtengut la dobertura d’un cors al Conservatòri de Carcassona. Obrèt a la realizacion del filme Bodega, buf de vida e d’un CD doble Bodega en viatge per far descobrir l’instrument. Ven de crear la formacion Bodegam bal per animar concèrts e balètis. La bodega se marida tanben amb l’aubòi dins la formacionMar e Montanha.
En aquesta fin de 2020, ven de publicar un libròt dins la colleccion pels joves legeires Farfadet de l’IEO Aude: La Crab’Estela per contar l’origina legendària de l’instrument. Lo tèxte s’apièja sus l’espectacle atal entitolat que presentèt fa qualques annadas pel jove public.
Lo ròtle bèl de la fada Mitona
Òc, cossí nasquèt la bodega? Sòfia Jacques-Serano revèla, pels pichons e pels grands, cossí aquò se passèt un còp èra… Cossí una craba se transformèt en un instrument de musica, quin ròtle joguèron dins l’istòria una fada Mitona, lo pichon Tiston e l’ors Pèdescauç?
Lo libre de 16 paginas es polidament illustrat de 4 dessenhs plena pagina per Pascala Théron (bodegaira, ela tanben). En mai de legir lo libre, podètz escotar l’istòria dita per l’autora e Isabèla François, amb d’illustracions musicalas, dins un enregistrament d’Ives Saint-Germain siá en podcast mercé a RCF-Pays d’Aude e sa cronica occitana Als 4 Vents, siá en vos procurant lo CD de l’enregistrament.
Avantast
En avantast, vaicí la debuta d’aquela istòria plan misteriosa:
“La bodega es nascuda d’una craba. “Cossí! me diretz, nascuda d’una craba?” E òc, e aquò se passèt pas dasièr ni mai ièr passat. Vaquí cossí se passèt i a plan plan de temps.
Un còp èra, i aviá una fada Mitona. Sabètz, las fadas, coma las sansònhas, an una familha de las bèlas, n’i an de tota mena: i a la fadarèla, la fadeta, la masca, la fachilièra, la bruèissa, l’encantada, tot un fum ... aquela d’aquí èra una fada mitona. Son elas las mitonas que se mainan de las aigas e de las fonts, mas aquela d’aquí èra tanben fòrça amiga amb los vents.”
Alan Roch
 | JACQUES-SERANO, Sòfia. La Crab'estela, IEO AUDE - Farfadet. Lo libre: 5 èuros (+ 2 èuros de còstes de mandadís); lo libre e lo CD: 8 èuros (+ 2 èuros de mandadís). De comandar a IEO Aude, BP 51042, 11860 Carcassona Cedex. |
| fffff | fffff | |
| L’Almanac de Quercòrb | ||
| A Eissalabra, la musicaira participa a la vida del Cercle Occitan de Quercòrb (IEO) que publica cada annada un Almanac dins la tradicion d’aquelas publicacions: calendièr, desssenhs umoristics, recèptas, conselhs per l’òrt, los sants e las santas de festejar, poèmas, contes e racontes, retraches, reviradas… E lo tot en lenga d’òc. L’edicion de 2021 sortirà dins lo corrent del mes de genièr. AR | ||
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Mi plas tot plen la bodeg
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari