Vist qu’eth vaccin contra era covid-19 non arribarà en Aran enquiath 2021, eth Conselh Generau d’Aran a decidit per iniciativa pròpia e sense eth consentiment des govèrns estatau e catalan, començar a administrar a partir d’aué madeish era sua solucion contra eth coronavirus. Eth vaccin aranés a estat desvolopat en hub tecnologic deth CEI de Casau per ua corporacion scientificomedicau jos era supervision de Marimonda, ua renomada medicine manager e arrehilha d’una coneishuda guaridora deth país.
 
Dempús de quauqui mesi d’estudis e provatures damb diferenti elements, era darrèra e mès efectiva version deth vaccin desvolopat per Marimonda Corporation includís un percentatge naut d’Allium sativum —un coneishut antibiotic naturau—, e tanben Ribes nigrum, fòrça rom deth nere e un peishic de Trifolium alpinum, entre d’autes èrbes, tot de produccion aranesa, tà non auer de depéner deth barrament o dubertura des frontères que decreten aleatòriament e sens cap de critèri es autoritats politiques d’un o un aute costat deth Pònt d’Arrei. Era aplicacion deth vaccin, que s’administrarà per via orau, a provocat coma unic efècte segondari entre es valenti que ja an gosat préner era potinga, quauqui dies de mau alend e, en dòsis nautes, ua shepèra considerabla: “Dempús de tantes setmanes embarradi e sense saber qué fóter ja èm acostumadi a anar harti, e ja non è ne mau de cap”, a declarat un des volontaris.
 
Aué deluns, a partir des dètz deth maitin, en Palai de Desgèu de Vielha començarà era campanha de vaccinacion obligatòria tà totes e toti es aranesi que trabalhen en sector servicis e en contacte dirècte damb era toristalha. Era administracion deth vaccin qu’anarà per orde alfabetic segon eth nòm dera casa, siguen deth pòble que siguen: de 10 a 12, des d’Andrèu enquiàs de Cocai; de 12 a 14, des de Cristala enquiàs deth Gauach, e atau successivament. Canau Jornalet actualizarà cada ora er orde de vaccinacion, tà que sapiatz quan vos tòque as de casa vòsta.
 
 
 
 
XGR