La justícia de l’Arabia Saudita ven de condemnar a 5 ans e 8 meses de preson Lujain Al Hathlul, una activista pels dreches de las femnas. La pena l’impausèt diluns passat un tribunal especial contra los delictes de terrorisme. Es condemnada per agitacion, utilizacion d’Internet contra l’òrdre public e obesissença als interèsses estrangièrs.
 
La sòrre de Lujain Al Hathlul a anonciat que depausarián un recors. “Ma sòrre es pas una terrorista; es una activista. La senténcia per son activisme en favor de las meteissas reformas que las promòvon amb tanta fiertat Mohammed bin Salman e lo reialme saudita es d’una ipocrisia maximala”, çò a dich.
 
Al Hathlul se faguèt conéisser per aver amodat una campanha contra lo tutoratge masculin e per que las femnas poguèsson menar de veituras. De soslinhar que fins al mes de junh de 2018 èra enebit que las femnas se trobèsson al volant d’un veïcul. En decembre de 2015, las femnas poguèron votar pel primièr còp.
 
 
De torturas
 
Lujain Al Hathlul , e dètz autras activistas, las encarcerèron lo 15 de mai de 2018. D’activistas pròdreches umans denóncian qu’en preson a patit de maltractaments e quitament de torturas coma de descargas electricas, de flagellacions e quitament d’agressions sexualas. Las autoritats saudianas desmentisson aquelas afirmacions en afortissent que res se pòt pas demostrar. Pasmens, en 2019 las autoritats del reialme li prepausèron de li reduire la pena se retirava las denóncias per torturas, mas ela o refusèt.
 
 
Refús de l'ÒNU e de Joe Biden
 
D’expèrts en dreches umans de l’ÒNU an assegurat que las acusacions contra Al Hathlul son “falsas” e an demandat que siá liberada immediatament. Tanben s’es interessat a l’afar lo gabinet del president elegit dels Estats Units, Joe Biden, qu’a manifestat son inquietud pels dreches umans dins lo reialme saudita.