Quatre ans e mièg après lo referendum del Brexit, e après de milièrs d’oras de negociacions e de vòtes complicats al parlament britanic, enfin lo Reialme Unit e l’Union Europèa an començat un nòu biais d’èsser en contacte après gaireben cinquanta ans de camin ensems. Dempuèi aqueste primièr de genièr es intrat en vigor l’acòrdi comercial entre Brussèlas e Londres, après un an de transicion. Aquel acòrdi es encara provisòri e lo deuràn validar abans la fin de febrièr los eurodeputats.
 
Desenant, se torna metre en plaça los contraròtles doanièrs entre lo Reialme Unit e los estats de l’UE. Desenant, las entrepresas qu’expòrtan e impòrtan deuràn pagar de dreches de doana, puèi que lo Reialme Unit es fòra de l’Union Europèa.
 
Gibartar e l’Irlanda del Nòrd foguèron los subjèctes mai complicats dins las negociacions. Gibartar es ara dins l’espaci Schengen: i a liura circulacion de personas. Parièr en Irlanda ont tanben las mèrças poiràn circular liurament entre lo nòrd e lo sud, mas s’impausa una frontièra “reguladoira” entre l’Irlanda del Nòrd e la rèsta del Reialme Unit.