L’agéncia Virasolelh anóncia que lo purmèr prèmi Joan-Pau Verdièr de la cançon occitana 2020 es decernit au cantaire carcassonés, Christian Almerge, per sa cançon Ma Tèrra occitana.
 
Damb la resulta deu concors sosmetuda au vòte deu public, es pas una suspresa que la grana popularitat deu cantaire deu famós grop Test aja hèit clinar la balança damb mès deus 65% deus vòtes. Lo prèmi recompensa atau un musicaire que vira fòrça suus emponts occitans dempuèi longtemps e que hè sonar la lenga de pertot.
 
Conegut dempuèi longtemps damb lo grop Test per sas adaptacions d’esperit risolièr en occitan (Lo Mildió per Only you, I love cagaròls per I love rock’n’roll, mes sustot l’irresistibla Massey Ferguson, parodia de la gainsboresca Harley Davidson), Christian Almerge signa aquí una polida balada folk pingorlada d’una punta de sonoritat medievala (omenatge aus trobadors) mesclada au son d’una guitarra metau e acompanhada d’un polit tèxte generós e poetic, declaracion d’amor au país. (Véser aquí dejós)
 
S’aqueste palmarés consacra purmèr quauqu’un de confirmat, la dusau plaça, per contra, es devoluda a una cantaira de descobrir peu public occitan, Séverine Bonnin, damb la cançon Catarsis, de l'autor Paul Turchi-Duriani, adaptada en occitan per Franc Bardòu damb la musica d'Yves Ousset.
 
Lo prèmi deu milhor filmòt vidèo de l’annada, eth, es decernit au clip Cotelon deu grop Cocanha.
 
L’agéncia Virasolelh, organizaira de l’eveniment, se regaudís de las 1264 votacions, çò que, per un concors tot navèth, es una escaduda de las beròias. Tre que serà possible, una serada serà organizada a Tolosa per la remesa deus prèmis, un omenatge a Joan-Pau Verdièr, la presentacion deus filmòts nomenats e lo concèrt deus laureats.
 
 
 
JML / Virasolelh


 
 
 

fffff		fffff
	Christian Almerge: Ma tèrra occitana Es un país de mar e de montanha E de camins de grand solelh De Mediterranèa a la Mar Granda E d’Alps als Pirenèus . Un país de frigola, de lavanda De figas e de mèl Cantarai totjorn ma Tèrra Occitana Mon país, mon joièl   Es un país a las marchas d’Espanha D’olius, de vinhas, e de pastèl Un país blau, un país de cocanha Liure coma l’aucèl Dins la frescor de cada matinada Dins la dolçor del ser Cantarai totjorn ma Tèrra Occitana País de grand solelh   Es un país de fada tramontana E de camins de libertat Ont se passeja la lenga mairala De ciutat en ciutat Dins l’aire clar, portat per las campanas L’accent tinda plan bèl Cantarai totjorn ma Tèrra Occitana O mon país rebèl   Es un país d’onor e de paratge De fièrs castèls crincats al cèl E de batèstas que menèron los rèires Per semenar lo blat novèl Es aquí que s’aluquèt la flama Pertot s’espandirà Cantarai totjorn ma Tèrra Occitana Que jamai plegarà   Es un país de mar e de montanha E de camins de grand solelh De Mediterranèa a la Mar Granda E d’Alps als Pirenèus . Un país de borietas amagadas E de vilatges cocarèls Cantarai totjorn ma Tèrra Occitana Mon país, mon joièl

 

fffff		fffff
	Séverine Bonnin: Catarsis Autor : Paul Turchi-Duriani Adaptacion : Franc Bardòu Musica : Yves Ousset

 

fffff		fffff
	Cocanha: Cotelon