En Honduras, an tornarmai assassinat un activista ecologista indigèna. Félix Vásquez, de 60 ans, lo tuèron lo 26 de decembre passat a Santiago de Puringla, dins la nuèch, qualques setmanas après senhalar de menaças de mòrt. Après tuar Félix Vásquez, los quatre assassins cagolats tabasèron e menacèron sos quatre enfants adultes, que demoravan aquí, çò rapòrta Reporterre que citaThe Guardian.
 
Félix Vásquez fasiá partida del pòble lenca, coma Berta Cáceres, que sa lucha e sa mòrt aviam ja raportadas sus las paginas de Jornalet.
 
Dempuèi los ans 1980, Félix Vásquez defendiá los dreches fonzièrs indigènas e aviá organizat l’oposicion a de megaprojèctes destruseires de l’environament: de minas, de barratges idroelectrics, de pargues eolians e d’esplecha forestièra. Ajudava tanben las comunautats despossedidas a recobrar lors títols fonzièrs ancestrals.
 
Aviá recebut de nombrosas menaças, e patissiá un secutament permanent de part de soldats, de policièrs mas tanben de paramilitars que cercavan de protegir los interèsses dels grands entrepreneires agricòlas e minièrs dins lo departament de la Paz, al nòrd-oèst de la capitala Tegucigalpa.
 

E mai un autre activista assassinat
 
En mai d’aquò, encara un autre crime. Lo 29 de decembre, los mèdias locals assabentavan de l’omicidi d’un autre activista, Adán Mejía, del pòble indigèna tolupán, que seriá estat atacat mentre que tornava de sos camps de gròs blat a Candelaria, una comunautat rurala del departament de Yoro, dins lo nòrd del país.