La CRI (Coordinacion daus Ribairòus e Impactats) e lo collectiu ciutadan contra la LGV e per lo POLT, doas associacions que militan contra la LGV Limòtges-Peitieus, an escrich a la fin dau mes de març a Jacques Reiller, prefecte de Vinhana-Nauta, per li demandar d'organizar un debat public noveu sus queu projecte d'amainatjament. Consideran que començar l'enquesta publica seriá illegau. D'efiech, quela enquesta, que permet au prefecte de declarar l'amainatjament d'utilitat publica, se deu far dins los cinc ans que seguen la fin dau debat. E lo delai se 'chabet lo 29 de genier passat. Lo quite president de la Comission Nacionala dau Debat Public (CNDP) jutja qu'una novela sasina de son instància es necessària davant de començar una procedura d'enquesta public. Per Réseau Ferré de France (RFF), seriá totparier possible de zo far, perque lo còdi de l'environament demanda que la situacion aia chamnhat d'un biais radicau per tornar dubrir un debat public. Çò qu'es pas lo cas. Lo despassament dau delai per l'enquesta publica seriá comun. RFF balha coma exemple lo contornament ferroviari de l'aglomeracion lionesa. Pasmens, per los opausants, quelas situacions s'an poguts passar perque p'una associacion n'aviá fach de recors davant un tribunau.

 

Maime Caillon