L’Alman’òc del cercle occitan de Fois ven de paréisser. Dempuèi mai de 30 ans, sa tòca es de presentar l’occitan a travèrs de l’escrit dins sa dignitat de lenga qu'o pòt tot exprimir, per l’opausar al reng de patés que l’i vòlon manténer las mentalitats exagonalas. L’idèa de fargar un almanac occitan ven de la capitada remarcabla de L'Almanac patoués d’Arièjo que pareguèt de 1891 a 1936. Aquel “almanac patoués” correspondiá a una epòca que l’escòla publica, laïca e obligatòria de la republica “francesa” matrassava “les pateses”. Uèi, pensam que se pòt pas aimar le país e daissar s’atudar la lenga, e fasèm un trabalh collectiu per resistir a l’escafament.
 
Un almanac, evidentament es pas una òbra literària. I traparetz badinadas, cracas e galejadas, testimòni de l’ambient gaujós qu’enròda la còla al trabalh, provèrbes, aforismes, devinhòlas, cançons, mots crosats e recèptas de cosina, contes e recits, sovent de sovenirs amb una color risolièra o poetica. E de còps l’expression de vejaires, quand de problèmas grèus de societat nos interpèlan. la lenga deu acompanhar la luta per las valors que son prigondament de valors occitanas e universalas a l’encòp: egalitat, solidaritat, justícia…
 
 
 
 
Annia Wolf

 
 

 

---

Cercle occitan Pèire Lagarda de Foish. Alman'òc 2021.