Lo govèrn francés demanda als quinzistas de reportar las partidas contra los britanics. Que ne serà a la prima pels catalans e pel Tolosa Olimpic per jogar en Superliga e en Championship? Los angleses parlan de començar mai tard las competicions per dire d’aver de public. Caldrà imaginar un exili cap Anglatèrra coma pels neozelandeses en NRL que se son ja installats en Austràlia per la preparacion de la sason.
 
A l’internacional, los australians ajustan una sisa en disent que l’essencial per eles es lo campionat NRL e las 3 confrontacions dels Estats d’Origina, e que se fan pas una obligacion de defendre lor títol mondial a la Copa del Mond prevista en Anglatèrra a la tardor. Poirián siá renonciar, siá mandar los “mens de 23 ans”!
 
Lo problèma de la moneda se pausa per totes los clubs: partidas sens public, pas de recepcion, pas d’estanquets… Una activitat afortida suls rets socials pòt pas remplaçar los rendètz-vos en “presencial”, coma se ditz ara.
 
Per las formacions amatrises e pels joves, que devián benlèu reprene las competicions en febrièr, se parla ara de la possibilitat d’una annada blanca. Aquò deuriá entraïnar una pèrda de licenciats, levat se, al moment de la represa, l’enveja de jogar es la mai fòrta.
 
Lo govèrn a parlat d’ajudas financièras, mas la soma anonciada devesida entre totas las federacions e totes los clubs farà una misèria per cadun. De clubs qu’aimarián plan que lo poder diguèsse clarament ont pòdon penjar lo lum e, qu’a XIII, espèran d’indicacions dels novèls responsables federals.
 
E quand es pas la pandemia que pausa problèma, trapa d’ajuda del costat dels tempèris! La nèu a fait interdire per la municipalitat comengesa la partida St Gaudenç-Avinhon qu’èra prevista aqueste dimenge. Meteissa decision a Palau, en rason d’una pelena jos un mètre de nèu: pas de partida contra Avinhon.
 
Lo calendièr es vengut completament bolegaire e en modificacion permanenta. Se lo campionat d’Elèit 1 avança patin-patan, que ne serà del debanament de la Copa Lòrd Derby?
 
 
Carcassona XIII: canaris o aglas?
 
Demoravan doncas tres partidas al programa. Dissabte de vèspre, es sus la pelena de l’estadi Brutus que los Dragonets recebián Lesinhan. La partida foguèt d’un nivèl bèl e los catalans saupèron profeitar de las fautas audencas per ganhar: 14-8.
 
Dimenge, als Minims, Limós en dificultat d’efectius se faguèt susprene per la jove formacion tolosana que ganha 26-14 e que se trapa atal candidata per la qualificacion: çò que càmbia dels percorses catastrofics de las sasons passadas.
 
Sus l’estadi Max Rousié, Vilanòva, sens desfaita per ara, recebiá los primièrs: Carcassona XIII. Aparentament, l’Òme Nadal aviá daissat als Leupards un gòrb refofant de fautas de man. Los Jaune e Negre dominèron lo primièr temps per menar 12-0 a la pausa. Tornavan marcar un ensag tre la represa sus una marrida recepcion de l’arrièr local. La revòlta dels Verds e Blanc venguèt tròp tardièra, mas los Canaris contunhèron lor prestacion de tria per ganhar sus la marca sens apèl de 37-12.
 
Lo dèrbi Limós-Carcassona serà l’aficha bèla de la jornada venenta que ne balham lo contengut (jos resèrva de cambiaments): Lesinhan-Palau, Tolosa-Albi, Vilanòva-St Gaudenç e Avinhon-Dragonets.
 
 
Jogaire de XIII e professor d’occitan
 
Vos cal gaitar lo reportatge sul tres-quarts centre d’Albi XIII Nicolas Bianchini, que passarà tanben lo CAPES d’occitan a la prima, dins l’emission Viure Al País d’aqueste dimenge 10 de genièr.



 
 
 
Alan Roch