Abans de quitar lo poder, Donald Trump ven de far un present a l’indústria petrolièra e gasièra amb de marridas consequéncias per l’environament. Lo 5 de genièr, se cambièt la lei que protegís los aucèls migratòris, de sòrta que las companhiás seràn pas pus punidas se ne tuan. La velha, s’èra cambiat la regulacion suls estudis scientifics que seràn pas pus preses a l’ora d’elaborar de règlas de santat publica, çò rapòrta The New York Times.
 
Los environamentalistas an qualificat la decision de “crusèla”. De son caire, un naut foncionari de la còla de transicion de Biden a dich als jornalistas que s’agís d’una “ataca implacabla” contra l’environament e a promés qu’aquelas politicas serián reviradas. Ça que la, aquò prendrà de temps.
 
Als Estats Units an rarament perseguit las tuariás d’aucèls, mas i a agut d’excepcions notablas, coma quand l’administracion Obama denoncièt en justícia sèt societats petrolièras en Dakota del Nòrd per la mòrt de 28 aucèls. De soslinhar tanben lo pagament de 100 milions de dolars de BP per la mòrt de mai d’un milion d’aucèls en consequéncia del desastre de la plataforma petrolièra Deepwater Horizon en 2010. Un an abans, Exxon Mobil aviá pagat 600 000 dolars après que declarèron aquela societat colpabla de la mòrt de chòts, de rapaces e d’aucèls aigassièrs protegits.
 
Mentretant, los mèdias parlan fòrça de Donald Trump a prepaus de l’assaut contra lo Capitòli de Washington e de sas consequéncias, que Twitter li a levat lo compte e qu’aquò li pòt costar una destitucion a la darrièra minuta de son mandat.