Actualitats
Ochanta manifestacions simultanèas contra la dicha “Lei de seguretat globala”
Una coalicion inedita de la societat civila de tot l’estat francés se planh d’una lei que permet d’amagar d’abuses policièrs
En Occitània i aguèt de mobilizacions a Ais de Provença, Aubenàs, Avinhon, Baiona, Besièrs, Bordèu, Caors, Carcassona, Clarmont-Ferrand, Dinha, Fijac, Florac, Fois, Gap, Lemòtges, Lo Puèi de Velai, Marselha, Montelaimar, Montpelhièr, Narbona, Niça, Nimes, Niom, Orlhac, Pau, Peireguers, Seta, Tolon e Tolosa qu’auriá aculhit la manifestacion mai nombrosa, amb 4000 manifestants segon los organizaires.
Aquesta lei, e mai que mai son article 24, qu’enebís de prene d’imatges dels policièrs en accion, a entraïnat de nombrosas protèstas per tot l’estat francés e l’an contestada amb fermetat de jornalistas, de fotografes, d’organizacions umanitàrias e politicas, de sindicats...
Las manifestacions las a organizadas la coordenacion #StopLoiSécuritéGlobale que fedèra una ochantena de sindicats, societats, collectius, associacions de jornalistas e de realizaires, organizacions de defensa dels dreches umans, comitats de familhas de victimas de violéncias policièras, de collectius de quartièrs populars, de Gilets Jaunes, d’actors e de representants del mond cultural e de la fèsta e del collectiu LGBT.
De soslinhar que las violéncias policièras contra los ciutadans dins l’estat francés son a prene de dimensions fòrça inquietantas.
75 detenguts e una rave-party inexistenta
Lo ministre de l’Interior Gérald Darmanin a raportat “75 personas interpeladas, dont 24 a París e a manifestat son sosten als “12 policièrs e gendarmas nafrats”. Cap de rapòrt sul nombre de personas nafradas entre las mans dels agents.
A mai, Darmanin s’es felicitat publicament que la polícia aja empachat una rave-party près de la manifestacion a París. Mas i a pas agut cap de rave-party dins cap de las ochanta manifestacions. E de fach, n’a pas cap de sens l’organizacion d’una rave-party non declarada al centre de París. Segon l’AFP, “aquelas gents fasián partida de la manifestacion, qu’èra confòrma a çò qu’avián declarat a la prefectura de polícia [...] Avián preparat de bandeiròlas per manifestar”. Aurián confondut tres camions sonorizats amb una rave-party?
De mençonar, pasmens, que dins qualques vilas, de participants d’aquela sòrta de fèsta an jonch lo movement “pel drech a la cultura” e contra “la repression desproporcionada” après la repression d’una fèsta illegala d’aquela mena que se tenguèt en Bretanha pel cap d’an. De fach, a la manifestacion de Nantas i aviá una bandeiròla que disiá: “Sèm totes d’organizaires de raves”.
Quatre manifestations ce samedi #5decembre à #Toulouse, #StopLoiSecuriteGlobale ainsi que contre le chômage et la précarité : déjà des milliers de personnes et une belle convergence des luttes avant le rassemblement de ce soir au Capitole. pic.twitter.com/9IMLunv0lz
— Dorian M (@DorianMffe) December 5, 2020
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Las imatges de la policia pegant a las femnas, als nins, als vielhs, son document acusatoris que demostran la brutalitat d'un cos qu'auria de servir per defensar al poble.
De soslinhar que las violéncias policièras contra los ciutadans dins l’estat francés son a préner subretot de dimensions fòrça fascistas. Los metòdis non son pas mai simplament coercitius davant de comportaments discutibles : son venguts de vertadièrs castics anti-contestataris, per dissuadir del mai que se pòsca las gents non encara engatjadas de rejónher aqueles movements. Son qu'es complètament illegal e contrari la la declaracion universala dels dreits umans.
Mas non s'i cal pas enganar : la polícia non es la causa del problèma, mas sonque sa manifestacion mai violenta. Lo problèma es que l'ultraliberalisme es per principi o,compatible amb tota democracia efectiva, coma es mecanicament amb tot ecologisme efectiu. E coma non pòt sofrir cap discutida ni cap negociacion — coma s'el tenguès la vertat absoluda — aplica sense vergonha la violéncia contra lo pòble. Puèi emplega la propaganda per se defendre d'o aver fait e continuar "business as usual". Manifestar, coma dissabte passat a Tolosa, es vengut complicat, riscat, aventurós, dangierós. Aquí ne sèm per ara.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari