Quand s’anullèt lo dèrbi Limós-Carcassona, en març passat, lo jorn del primièr torn de las municipalas, òm s’imaginava pas èsser dètz meses puèi dins la situacion presenta: un campionat arrestat per 2020, las partidas a pòrtas barradas dempuèi la represa a la fin d’octòbre, un estadi de l’Agulha void pel grand classic dins una vila privada de Carnaval! L’an passat, Limós èra en cap de classament; Carcassona èra eliminat en Copa e en marrida posicion per se qualificar en campionat. Aqueste dimenge, per contra, Carcassona arribava en cap de fila del campionat, alara que Limós èra dins lo dobte amb una infirmariá plan garnida e aprèp una desfaita al cap d’una non-partida a Tolosa.

Mercé a dos ensages, Limós menarà 12-6, mas una patanada de l’arrièr dins son en-but fa present a Carcassona d’un ensag transformat. Amb una penalitat en mai, los Canaris menan 16-12 a la pausa. Dins lo segond temps, Limós ensajarà de reversar lo cors de la partida: mas Clamenç Herrero se fa la mala e lança Vincenç Albèrt a l’ensag, puèi Miquèl Simon carga e libèra la pauma per un ensag de l’irlandés Mullaly; los limosencs tornaràn a 26-28 a 12 minutas de la fin, mas de fautas de man lor permetràn pas de capvirar la marca.
 
Dissabte, foguèt una passejada de santat per Lesinhan fàcia als Cavals Fòls de Palau que semblavan a de polins nòunascuts: victòria dels Molinièrs 54-6. Dimenge, Albi se torna lançar dins la caça a una plaça qualificativa amb una victòria a Tolosa: 26-16. Vilanòva se deu emplegar per batre Sent Gaudenç: 36-30. A Avinhon, los Dragonets menan 14-0 a la pausa e resistisson al retorn dels provençals per ganhar 20-14.
 
 
Se jogarà deman o deman passat…
 
Per la represa en Anglatèrra, vista l’arribada de la version novèla del virus, las autoritats remandan las debutas de competicion mas amb la necessitat de prepausar un cèrt nombre de retransmissions a la television. Aquò sembla de virar a la quadratura del cercle!
 
La debuta de la Superliga se farà pas la dimenjada del 11 de març: es remandada de quinze jorns.
 
Pel Championship, lo nombre de partidas de la fasa regulara seriá redusit de 26 a 22. La represa se farà pas a la fin de febrièr, mas tres setmanas mai tard. Per ara, las formacions se pòdon entraïnar mas sens contacte entre los jogaires!
 
Per çò qu’es del tresen nivèl, la League One, caldrà probablament esperar la debuta de mai per entamenar la competicion.
 
Aquelas represas de datas diferentas van pausar la question del debanament de las qualificacions en Cup.
 
 
La deca bèla del primièr ministre
 
Dins una de sas nombrosas presas de paraulas, lo primièr ministre de França, Joan Castèths, tenguèt de prepauses que nos atristan e nos daissan bravament malcorats. Aquí çò que diguèt: “Se jutja pas una partida que va durar nonanta minutas al cap de doas segondas.”. Òc, avètz plan legit: nonanta! E pas, coma cadun o sap, las quatre vints minutas que duran una partida de rugbi (a XIII tanplan coma a XV). Declaracion vergonhabla per un enfant de Gasconha e cònsol d’una ciutat catalana: basta pas de se faire tractar de “primièr ministre de l’accent de tresen mièg temps” per la premsa parisenca (que relevèt aquesta metafòra fotbalistica); puèi, cal assegurar e ligar la dimension rugbistica al cant de las cigalas e a las aigas que rajan suls codolets! Cal pas renegar las rasigas!
 
E somiam del jorn, ont en plaça de clavar una declaracion per “Vive la République! Vive la France!”, lo president o lo primièr ministre saludaràn los auditors d’un: “Lo XIII, aquò òc!”
 
 
 
 
Alan Roch