L’Insitut Goddard d’Estudis Espacials, de la NASA, a publicat recentament l’analisi annala de las temperaturas mejanas a la superfícia de la Tèrra. Es de soslinhar que 2012 es estat la novena annada mai cauda que s’es constatada. Pasmens, aquel fach es pas anecdotic mas “plan normal”: practicament totas las annadas mai caudas correspondon al darrièr decenni, segon lo registre istoric de l’agéncia estatsunidenca, que comença en 1893. Es dins aquel periòde que lo rescalfament de la temperatura mondiala s’es consolidat. La revista New Scientist a decidit de concretizar aquelas donadas per endreches e per annadas.
 
Sus la mapa interactiva “Your warming world”, New Scientist cèrca de demostrar que los cambiaments de temperatura observats per la NASA a escala mondiala, transferits als domenis locals e regionals en general, mòstran un gra de rescalfament fòrça mai extrèm.