Las masquetas que vesèm se passejar per carrièras son, per la magèr part, blavonassas, blancassas, tristassas. Aplech pels metges que luchavan contra la pèsta, un còp èra, temps es vengut uèi pel becanàs.

A l’avenidor, remplaçarà la masqueta. Doas fabricas son a l’aprestar: una en Occitània a Limós per aqueles que la volòn personalizada. Cadun podrà aital causir la forma del bèc: poparut, magrostèl, bofigat, finòt, longuèt, longàs, longaràs... e la color: mirgalhat, jaune solelh, blau de mar, verd de prat, roge sang, ... Per los qu’aiman las masquetas italianas valdrà melhor las far venir de Venècia. Aital, auràn la causida entre de Zannis de totas las colors mai embelinaires los unes que los autres.

 

Abans de botar lo nas defòra, serà necite d’emplir lo bèc del becanàs amb la descoviaca. La descoviaca es un contrapoison, pus fòrt que la teriaca, fargat amb de polsa de pèl secada de grapaud jove, de jauneta vièlha, d’enduèlh rafit. I cal ajustar d’èrbas. Mai de cinquanta cinq menas d’èrbas trobaretz dins la descoviaca: frigola, serpolet, borratja, isòp, gengibre, e maitas qu’avèm pas drech de desvelar aicí. E puèi, pas de descoviaca sens un pecic d’eucaliptús, un sasic de romarin, un escopit de canabèrja, un det de lavanda e un molonàs d’autras encara qu’es secret de fargadís.

 

La descoviaca es venduda dins de taps, taps a ensacar dins lo bèc del becanàs. Cal dos taps per bèc, l’un neteja l’aire que dintra, l’autre filtra l’aire que sortís. L’eficacitat del tap es d’un mes. Amb vint e quatre, fasètz l’annada! Un sol laboratòri dins lo Mond sap aprestar la descoviaca per la rason bona qu’es lo sol a mestrejar lo fargadís de la polsa de pèl secada de grapaud jove. Per ara, lo labo n’es a la tresena fasa de validacion, la quatrena deuriá pas tardar. Podèm pensar, mas es pas segur, que los taps seràn lèu-lèu a posita dins totas las potingariás del país.

 

E deman, qual vendrà se planhér de trapar per carrièras, en plaça d’aquelas masquetas tristassas, de femnas e d’òmes del nas alongat cargat de milanta colors mai belugejairas las unas que las autras? Lo becanàs coma la descoviaca serà gratuit.

 

Ara, a caduna e cadun de se fargar lo vestit mirgalhat qu’acompanharà lo becanàs. Una mòda novèla deurà espelir! Un carnaval novèl se deurà ajaire!

 

Mas i aurà totjorn de bècs fins per dire: “Quora serem desmascats?”

 
 
 
 
Clamenç
umorista de lenga occitana


 

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires.  As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.