Al contra de la tendéncia de la majoritat dels païses europèus, qu’an optat per d’armadas professionalas, los austrians an votat en referendum per manténer lo servici militar obligatòri. En la consulta, facha dimenge passat amb la participacion de 49% de l’electorat, l’opcion de la mantenença s’impausèt amb 59,77%, en fàcia de 40,23% que votèron contra. Lo referendum s’èra convocat perque los sòcis del govèrn en coalicion arribèron pas a cap d’acòrdi sus la question, lo Partit Socialdemocrata d’Àustria es contra lo servici militar, e lo Partit Popular d’Àustria i es favorable.

Lo resultat representa una morrada pel cap de govèrn socialdemocrata, Werner Faymans, que defendiá que de fòrças armadas mai pichonas e professionalas s’adaptarián melhor a la realitat militara modèrna e que serián mai rendablas e justas amb los joves.
 
Las fòrças armadas austrianas dispausan de quaranta cinc mila soldats e d’un dels budgets de defensa mai basses del Mond, mens de 0,8% del PIB. En Àustria, als gojats de dètz e uèch ans que ne son capables, lor cal complir sièis meses de servici militar o ben nòu meses de servicis socials. Justament aquel servici civil es çò que fòrça analistas an considerat qu’a salvat lo servici militar; una bona part dels ciutadans, çò creson los analistas, an votat pel servici militar pr’amor de la temor que, sens los servicis socials civils, se mancariá de personal per recebre d’ambulàncias, de primièrs secorses e d’assisténcia als vièlhs amb de problèmas de mobilitat. Es estat, en fach, lo principal messatge lançat pels democristians, amb l’argument que sens lo servici militar, i auriá pas pro de soldats per ajudar en cas de catastròfa naturala.
 
En defensa del servici militar, s’argumentava tanben qu’una milícia professionala seriá un passatge cap a l’intrada dins l’OTAN e, doncas, un renonciament a l’estatut de neutralitat d’Àustria, que se manten dempuèi 1955. E mai s’es nèutre, lo país participa a las missions de patz de las Nacions Unidas en Bòsnia e Kosova, e a de cascos blaus desplegats en Liban e sul Replanat de Golan.
 
La majoritat dels païses europèus an mes fin al servici militar obligatòri dempuèi la fin de la Guèrra Freja e an optat per d’armadas mai especializadas. Alemanha es estat lo darrièr país a abolir lo servici militar, en 2011, en seguissent los passes de Belgica, Espanha, França e los Païses Basses, entre d’autres. Lo Reialme Unit foguèt lo país pionièr en la professionalizacion, començada en 1960. Dins l’UE, doncas, solament Àustria, Danemarc, Estònia, Finlàndia, Grècia e Chipre contunhan de manténer lo servici militar obligatòri.