Los païses de l’UE decidiguèron dijòus passat que los estats membres poirián resténher la mobilitat dins las frontièras intèrnas e extèrnas de l’Union s’o requerís la situacion sanitària. En plena pandemia, los caps dels Vint e Sèt parlèron d'un eventual durciment de las mesuras pels viatges dins l’espaci Schengen, mas s'engatgèron a lo daissar dobèrt.
 
“Sèm totalament convencuts que cal servar las frontièras dobèrtas per manténer lo bon foncionament del mercat interior”, çò diguèt lo president del Conselh Europèu, Charles Michel, en tot precisar qu’es possible d’establir “de restriccions dins los desplaçaments non essencials”. E mai se demanda que s’encoratge de far sonque los viatges essencials, mentre que se crèa una categoria dicha “roge escur” pels territòris de l’UE ont lo virus se propaga rapidament. Los ciutadans d’aquelas zònas lor poirián exigir un provament negatiu per se poder desplaçar.
 
En çò que tanh a las frontièras exterioras, la Comission Europèa a prepausat “de mesuras addicionalas”; per exemple, que se pòsca exigir una pròva de diagnostic negatiu per intrar dins quin país que siá de l’UE.
 
Ça que la, l’estat francés demandarà una PCR negativa a totes los viatjaires de l’UE qu’arribaràn en avion a partir de diluns.