La Cort Suprèma d’Escòcia (Court of Session) es a analisar se lo parlament escocés a de prerogativas per aprovar las leis necessàrias per organizar un referendum d’independéncia sens l’acòrdi del govèrn britanic. Un grop d’activistas, guidats per Martin Keatings, an portat lo cas a la justícia après una campanha de micromecenatge per finançar los còstes de la procedura judiciària.
 
Aidan O’Neill, l’avocat que defend lo cas, considèra que los escoceses an drech de saber se lor parlament, conegut amb lo nom d’Holyrood, pòt organizar un referendum sens lo consentiment de Londres, sustot amb la proximitat de las eleccions legislativas del mes de mai venent. Lo màger argument per la defensa es que lo parlament escocés deu rendre de comptes al pòble d'Escòcia, que li balha sa legitimitat, e non pas de Westminster.
 
Lo tribunal se reüniguèt telematicament dijòus e divendres passats, mas sa resolucion finala se sauprà pus tard. Los activistas espèran que la decision permetrà d’accelerar l’organizacion d’un segond referendum d’independéncia.
 
Per ara, lo govèrn de Nicola Sturgeon a pas jonch los activistas qu’an pausat la question a la cort, mas es evident que la resolucion aurà una repercussion sus son estrategia politica. Sturgeon a promés un referendum d’independéncia pendent la primièra part de la legislatura que seguisca lo meteis modèl amb lo qual se convoquèt lo referendum de 2014, valent a dire que siá lo fruch d’un pache amb lo govèrn britanic. En 2012, lo primièr ministre britanic d’aquel temps, David Cameron, acceptèt que lo parlament de Westminster transferiguèsse lo poder a Holyrood per far la lei del referendum. Totun, l’actual cap del govèrn, Boris Johnson, refusa categoricament un acòrdi semblable.