Los imatges d’una brutala agression patida per un adolescent a París an trebolat l’opinion publica francesa. Las camèras de susvelhança an enregistrat cossí un desenat d’individus tabasan a còps de ponh, a còps de pè e amb de bastons, un jove nomenat Yuriy que foguèt espitalizat en estat de còma, amb divèrsas fracturas al cran, al nas, a las còstas, als dits e a las espatlas.
 
Se passèt divendres passat, 15 de genièr, e l’afar es tractat pels principals mèdias de l’estat francés. A mai, los rets socials son clafits de messatges e d’imatges de sosten jos l’etiqueta #JeSuisYuriy (soi Yuriy).
 
Dins las darrièras oras s’es sauput que la victima a començat de se desvelhar e de se mòure, mas se desconeis s’après l’agression poirà tornar aver una vida normala.
 
De fonts pròchas de l’enquista dison que Yuriyèra èra conegut dels servicis de la polícia per de faches violents e qu'auriá un casièr judiciari, çò rapòrta Le Figaro. D’imatges dels presumits agressors son a virar suls rets socials mas son pas encara autentificats. L’enquista s’orienta devèrs un reglament de comptes.
 

Instrumentalizacion per l’extrèma drecha
 
Demest las personas qu’an mostrat lor indignacion suls rets socials i a la cap del Recampament Nacional, Marine Le Pen. Ela a publicat lo vidèo de l’agression sus Twitter en tot criticar lo govèrn francés per aquela “ultravioléncia del quotidian”.
 
De grops ultradrechistas, coma lo canal de Telegram Ouest Casual, an atribuit l’ataca a “de negres e d'arabis” e an fach una crida a organizar de grops per agir fàcia a aquelas situacions. Aqueste canal de Telegram se consagra a difusar d’images de contengut ultradrechista e de suportaires de fotbòl neonazis de tota Euròpa.