Diluns passat, lo mond del Seten Art, que patís tantes problèmas a causa de la pandemia, remembrava los 125 ans de la primièra projeccion cinematografica de l’istòria, que se faguèt en Occitània. Lo filme pionièr L’arribada d’un tren en gara de la Ciutat, fach per Louis Lumière, se passèt al Teatre de l'Eden de la Ciutat (País Marselhés) e se ditz que lo public quitèron la sala espantats.
 
Lo Teatre de l'Eden tombèt dins l’abandon. Lo tornèron dobrir, tot reabilitat e modernizat, en octòbre de 2013 après 18 ans de barrament, gràcias a un prètzfach enòrme menat a bon tèrme per una còla d’abitants de la Ciutat. A la serada d’inauguracion comptèt foguèron presents de nombrosas personalitats del mond del cinèma.
 
En julhet de 2015 vesitèrem la Ciutat e aquí rescontrèrem Tonin Ollès que nos parlèt d’aquela pionièra projeccion de cinèma de fa 125 ans e de la recuperacion del teatre. Ara, pr'amor d'aquela efemerida, volèm recordar aquela entrevista. Una donada interessanta que la nos contava Ollès, es que lo rodatge del filme se faguèt lo 28 de febrièr de 1895, lo jorn qu’en Aubanha naissiá Marcèu Panhòl.