L’Organizacion Mondiala de la Santat (OMS) a demandat que s’arrèste las campanhas de vaccinacion après aver vaccinats los professionals de la santat e las personas de risc. Aital, l’OMS demanda que se faga una distribucion mai equitabla de las dòsis dins lo Mond entièr.
 
La pòrtavotz de l’organizacion, Margaret Harris, a assolidat qu’es çò que cal far “moralament” e “economicament”. Dins aquel sens, a pregat “los païses que, tanlèu vaccinar aqueles grops, asseguren l’accès d’autres als vaccins”, çò a dich dins un dejunar de premsa organizat per la BBC.
 
Segon Harris, i a divèrses estudis que demòstran qu’immunitzar de païses precises arrestarà pas la pandemia, mas qu’aquò la pòt quitament agravar e crear de nòus variants del virus. E a indicat qu’èra amb la “solidaritat internacionala” que se podiá empachar una repercussion economica pus granda, sustot dins los païses empaurits o emergents.
 
La setmana passada, un estudi manifestèt las diferéncias de vaccinacion entre los païses desvolopats e los autres. Segon aquel estudi, los 84 païses pus paures del Mond atenheràn pas l’immunitat de grop abans 2024, e mai qualques unes l’atenheràn pas jamai per manca de dòsis.