La fèsta de Sant Valentin se debanarà dimenge que ven a Tolosa en occitan e d’una faiçon non comerciala. Un collectiu d’associacions occitanistas en partenariat amb l’Universitat del Miralh an organizat una jornada per partejar l’amor en la lenga del país. Atal, los que se passejaràn entre 11h e 17h sus la Plaça del Capitòli i trobaràn penjadas mai de 300 cartas d’amor personalizablas, que poiràn despenjar, personalizar e far arribar a lors calinhaires e poiràn parlar amb los membres del collectiu que seràn presents sus plaça.
 
Se creèt las mai de 300 cartas que penjaràn dimenge los 23 e 24 de genièr passats dins un obrador de creacion poetica e de calligrafia.
 
L’idèa es espelida jol lèma “Parla-me en occitan, m’agrada” e prepausa als abitants de Tolosa de declaracions d’amor en occitan per rendre presenta la lenga nòstra e, a l’encòp, de metre de costat l’aspècte consumaire de la fèsta de Sant Valentin. O menan a bon tèrme lo collectiu d’ensenhaires del CRÈO Tolosa, de l’Escòla Occitana d’Estiu, e d’Òsca, l’associacion occitana de l’Universitat de Tolosa Joan Jaurés e especialament de sa seccion d’occitan. 
 
E mai l’usatge social de la lenga siá flac, l’occitan es totjorn considerat coma una lenga d’amor dempuèi los trobadors. A mai, es encara una lenga presada e aimada per la populacion, a ne jutjar per l’enquista sociolingüistica de l’ÒPLO. Per tant, las iniciativas d’aquesta mena per rendre l’occitan public e popular son fòrça positivas.

 

---

Per ne saber mai podètz escotar l’emission Conta Monde de France Bleu del 7.2.2021