Ieu, soi la Covid coquina. Segur, me coneissètz pas! Soi joveneta, clafida de sanqueta, amorosa nècia dels òmes coma de las femnas. Fau pas la tria, joves, vièlhs, tot me conven. Aimi de passar de boca en boca mercé à l’escupit. Mas d’aquesta passa, sabi pas perqué, rescontri de mai en mai de bocas mascadas. E aquí per dintrar, vai-te’n far quèrre! Alara, cèrqui de desmascats. 
 
Après sièis oras del vèspre, sabi pas perqué, de portairas e de portaires de masquetas ne’n vesi gaire dins las carrièras. Alara, los acorsi dins lors ostals. E podètz pas saber lo plaser qu’ai! Figuratz-vos qu’an pas encara capitat de trobar lo biais de manjar sens quitar lor masqueta. Aquí, ieu, coquinassa, passi d’aise d’escupit en escupit. Quora de molonadas de masquetadas e masquetats s’apitançan, aquí me regali. Un festenal per ieu de tressautar de boca en boca. Soi jamai tant contentona qu’amb aquel moment!
 
A cada repais, arrestan pas de barjacar sus ieu. Pas pro. Per que charren encara mai de ieu, los cal pas acostumar, los cal desvariar. Es per aquò que de temps en temps càmbii de vestit. D’aquesta passa, pòrti la tenguda anglesa. Venguda Covid coquineta, mon escupit fissaire camina mai a la lèsta. Quora n’auràn un confle, passarai a la tenguda Africa del Sud. Venguda Covida coquinassa, mascats o desmascats, boca badanta passarai a la lèsta! E puèi un jorn benlèu virarai Covida coquinarassa se sentissi que mon prus amorós baissa. 
 
Me passegi sus la planeta tota. Se me soi facha escampar per un molon de masquetadas e masquetats, ai capitat pasmens de dintrar dins de milions de bocas. De bocas de las pòtas trempas, secas, mofletas, roginosas, rosetas... De bocas que flairan l’alh, la ceba, lo vin, la bièrra... sens comptar la flaira del poiridum de las dents traucadas, las botiòlas de lenga... L’escupinha blanquinèla, al plec de las bocas, es aquela qu’aimi mai! La desmacada o lo desmascat s’avisa pas de ma preséncia. Podètz pas saber lo plaser qu’ai de navegar coma escupida amorosa dins un cèl de boca! Es pas l’amor de luènh! Es pas l’amor de prèp! Es mai qu’aquò! Es l’amor dintra-dedins!
 
Covid coquina, soi benlèu pichonetona mas fau parlar de ieu d’en pertot! Segur, fòrça vòlon pas èsser amoroses de ieu, mas ieu, soi de mai en mai amorosa d’eles! 
 
 
Alara, se jamai tombatz sus la Covid coquina, abans de tombar la masqueta, fasètz mèfi!
 
 
 
 
Clamenç
umorista de lenga occitana




 

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires.  As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.