La setmana passada, la polícia d’Angòla arrestèt José Mateus Zecamutchima, un dels principals activistas del movement independentista del protectorat de Lunda Tchokwe (MPPLT). L’acusan de delictes de rebellion e d’associacion de malfactors. La detencion arribèt qualques jorns après lo masèl del 30 de genièr passat, ont las fòrças de l’òrdre tirèron suls participants d’una manifestacion de l’MPPLT dins la vila minièra de Cafunfu, çò rapòrta Global Voices  en citant RFI. Segon la polícia, los manifestants èran armats e volián atacar un comissariat. De dirigents politics e religioses locals asseguran qu’èran de manifestants pacifics desarmats e qualifican lo fach de “chaple”. Segon lo partit d’oposicion UNITA, la polícia tuèt 28 manifestants. D’autras fonts rapòrtan 16 mòrts.
 
Segon los primièrs elements de l’enquista, los manifestants èran d’obrièrs licenciats per la societat nacionala angolesa dels diamants, Endiama, e la polícia i anèt per arrestar las personas identificadas coma membres de l’MPPTL. La polícia a reconegut aver tuat mai d’una persona. 
 
“Avèm pas d’armas ni d’armada”, çò assegura l’MPPLT dins un comunicat publicat dos jorns après lo chaple. A mai, assegura que totas sas manifestacions “seguisson los canals constitucionals” e refusa categoricament que sas accions se pòscan considerar coma de “rebellion armada”, coma o a fach lo partit governamental angolés, l’MPLA.
 
Fondat en 2006, l’MPPLT revendica un estatut pròpri per Lunda Tchokwe, siá coma país independent siá coma territòri autonòm. Per eles, aquel territòri qu’ocupa la mitat orientala d’Angòla venguèt un protectorat de Portugal a la fin del sègle XIX en vertut de la signatura de divèrses acòrdis entre los reis locals e lo país europèu, çò rapòrta Nationalia. Aital, l’MPPLT assolida que Lunda Tchokwe faguèt pas jamai partida oficialament de la colònia d’Angòla, e que, doncas, son incorporacion dins aquel país es illegala.