A Aubon (Botèiras) los abitants an salvat la darrièra especiariá del vilatge. Un grop de benevòls an reüssit a collectar mai de 6000 èuros per salvar lo darrièr comèrci que demorava dins aquel vilatge vivarés de 160 abitants, çò rapòrta France 3. Desenant, serà pas pus obligatòri de se desplaçar en veitura per far las crompas. De soslinhar que lo supermercat pus pròche se tròba a 30 km.
 
Amb aquela inciativa, Aubon ten una especiariá associativa qu’al delà de prepausar produches ecologics e de proximitat es tanben venguda un endrech de retrobament. 
 
La botiga ten ara un depaus de pan e de pastissariás artisanalas, d’estatgièras consagradas als produches locals ont se pòt trobar de mèl, de confiments, de crèma de castanhas, de vinagre... An capitat que de païsans de l’entorn forniscan de produches de la sason, del temps que son a negociar amb d’autres productors del parçan per enriquir l’ofèrta.
 
En mai de tot aquò, l’associacion de l’especiariá solidària pensa dins l’avenir de far de petita restauracion e d’aduire de cultura, de libres e de jòcs per que l’endrech siá vertadièrament un centre de convivéncia.