La representanta del Ministèri Public demandèt, dimècres passat, uèch ans de preson pel gojat que presumidament tuèt Carla, una gojata de tretze ans, a còps de ponh, lo 20 de junh de 2011, davant lo collègi de Florençac (Besierés), ont la victima èra escolarizada. Lo jove Gaëtan, qu’al moment dels faches practicava la bòxa dempuèi dos ans, reconeguèt aver donat dos còps de ponh.

La viceprocuraira de Besièrs, Marina Jourdain, demandèt que lo tribunal decerniguèsse un òrdre de depaus, segon l’avocat de la familha de la victima, Luc Abratkiewicz.
 
“A evocat lo risc que representava, per ela, Gaëtan (...). Aquel gojat rèsta una enigma, contràriament a çò que los educators an dich, e avèm remarcat a la fin de l’audiéncia qu’aquel gojat es una ola de pression”, çò apondèt  Abratkiewicz.
 
“A dich uèch ans, lo maxim es dètz ans, se pòt pas calcular... res remplaça pas una vida. Esperàvem autra causa”, çò diguèt lo paire de Carla, en se disent decebut de l’actitud de l’acusat e de la dels sieus parents.
 
Gaëtan, qu’aurà dètz e sèt ans a la fin del mes, compareissiá dimècres per “violéncia volontària en avent provocat la mòrt (...) sens intencion (…) amb la circonstància que los faches se son comeses sus un menor de quinze ans”.
 
Segon l’expèrt medical legal, Carla moriguèt d’una emorragia intèrna per un uppercut seguit d’un gafet a la cara. En mai d’aquò, un testimòni afirmèt que lo gojat s’arrestava pas mai de tustar, coma “un can enrabiat”.
 
L’origina de l’agression seriá una rivalitat amorosa, desencadenada per Facebook, entre la sòrre de l’agressor e la victima.