Fòrta tension dins las Valadas Occitanas a causa de la decision del govèrn de non permetre pas la redobertura de las estacions d’esquí.
 
Lo 4 de febrièr, lo comitat tecnicoscientific del govèrn italian que gerís l’emergéncia covid permetèt la redobertura dels remontadors dins las regions classificadas coma zònas jaunas (amb mens de restriccions). Las estacions se podián dobrir a partir del 15 de febrièr amb una reduccion dels prètzfaches que se podián vendre sonque per un jorn. Alavetz, gaireben totas las estacions s’alestiguèron per poder tornar dobrir diluns passat en respectant las mesuras sanitàrias. De soslinhar que, per preparar las pistas, calguèt un trabalh de mai d’una setmana, recuperar los personals qu’èran estats licenciats e embauchar de novèls emplegats. Las despensas foguèron grandassas.
 
Pr’aquò, dijòus 12 de febrièr, en seguida d’un estudi de l’Institut Superior de la Santat, se trobèt la preséncia de la “varianta anglesa” sul 20% dels provaments realizats a Itàlia. La nauta contagiositat d’aquela varianta alarmèt los expèrts que demandèron al govèrn mai de precaucions a l’ora de redobrir las estacions. Totun, los mèdias estatals e los jornals pus legits i faguèron pauca atencion en tot raportar, dijòus e divendres, que diluns las estacions d’esquí tornarián dobrir. La Stampa soleta raportèt divendres de ser los dobtes del govèrn italian sus la redobertura dels sits.
 
Dimenge 14 de febrièr, la velha de l’inauguracion, las informacions comencèron de prene forma e crèdit. De ser, comencèron de córrer las rumors qu’èra probable que las estacions dobriguèsson pas del temps que d’autre caire s’afirmava que la dobertura èra gaireben segura. L’incertitud creada èra talament granda que quitament d’estacions coma Mondolè ski contunhavan de produire de nèu artificiala mentre que que d’autras anonciavan lor barrament. Enfin, dimenge a 19h53, lo Ministèri de la Santat assabentèt, per mejan d’un comunicat de premsa, de la decision de diferir la dobertura al 5 de març. Sul pic, i aguèt de fòrtas protèstas entre las direccions de las estacions d’esquí e los professionals per la manca d’anticipacion.
 
Diluns de matin, las estacions d’esquí de las Valadas dobriguèron pas en compliment de l’ordenança del Ministèri de la Santat. I aguèt de protèstas a l’estacion de Pian Munè, a Paesana (Val Pò), ont qualques expèrts exprimiguèron lor desacòrdi, e a Bardonescha (Val d’Ors), ont diluns de ser se tenguèt un acamp de protèsta que jonguèron los operators de torisme, los païsans, los botiguièrs, o e quitament las campanas de la glèisa. Fòrça elegits locals se solidarizèron amb lo mond de la nèu e demandèron una compensacion immediata. De soslinhar la reaccion del president de la província de Coni, Federico Borgna, qu’escriguèt una letra al ministre de la santat en soslinhant qu’“una gestion tan desorganizada serà pas pus tolerada per [lor] pòble”. Los responsables del sit diguèron que se sentián “enganats”.
 
S’escarta pas de protèstas per carrièras contra la decision tardièra. Suls rets socials a crescut lo crit “la montanha merita de respècte”. Totòm reclama mai de concertacion entre las autoritats centralas e los territòris.

 
 
  
Mattia Pepino