La setmana passada, las fòrças de seguretat turcas comencèron una tièra de detencions massissas contra d’activistas d’esquèrra e de personas restacadas al pròcurd Partit Democratic dels Pòbles (HDP). A l’ora d’ara, i a mai de sèt cents detenguts e lo ministèri public los acusa d’èsser ligats al Partit dels Trabalhadors de Curdistan (PKK), una organizacion que la considèra ara l’estat turc coma terrorista.
 
Las detencions coïncidisson amb un clima de fòrça tension en seguida de la mòrt de tretze ostatges turcs dins lo nòrd d’Iraq quand se menava una operacion militara contra de guerrilhièrs curds.
 
L’operacion s’es estenduda a 40 províncias de Turquia, qu’en total n’a 81, mai que mai a las de majoritat curda. Las detencions comprenon de caps de districte e de província de l’HDP e maites maires. A las darrièras eleccions, lo partit ganhèt 65 comunas mas, totun, 59 d’aquelas comunas son estadas l’objècte d’una intervencion. Almens 18 cònsols màgers son en preson preventiva, e mai 12 deputats del partit son encarcerats dempuèi 5 ans.