Lo robòt Perseverance es arribat sus Mart. Lo robòt explorador de la NASA se pausèt dijòus a 21h56 (ora d’Occitània) sul sòl de la Planeta Roja après un viatge de gaireben sèt meses e d’aperaquí 470 milions de quilomètres. L’aterratge se faguèt automaticament e dins l’incertitud pr’amor del retard de mai d’onze minutas de las comunicacions entre las doas planetas. Après superar amb succès las dichas “sèt minutas de terror” dins las qualas Perseverance davalava a 20 000 km/h, lo robòt es ara sus la planeta roja e a ja mandats los primièrs imatges. “Adieu Mond. Vaquí mon primièr agach de çò que serà mon ostal per tostemps”, çò publiquèt lo robòt sus son compte de Twitter.
 
Perserverance es lo cinquen robòt que la NASA a mandat sus Mart, après Sojourner, Spirit, Opportunity e Curiosity. Coma es mai grand que sos predecessors, sa tòca es la de recercar de traças de vida anciana sus aquela planeta amb l’ajuda d’espleches tecnologics innovants. Per aquela rason s’es pausat sul cratèr Jezero, que sembla d’èsser estat lo lièch d’un grand lac e que, doncas, poiriá èsser ric en microorganismes fossils. Tanben collectarà de mòstras e estudiarà la geologia e lo clima per dobrir lo camin a un viatge abitat.
 
Demest las aisinas de Perseverance, i a de microfòns per enregistrar pel primèr còp lo son de la planeta. Pòrta tanben un elicoptèr apelat Ingenuity que farà cinc vòls. Es lo primièr còp que se farà volar un objècte sus una autra planeta que la Tèrra. En mai d’aquò, adutz un esplech per tresmudar en oxigèn lo dioxid de carbòni, present al 96% dins l’atmosfèra marciana, per la respiracion dels astronautas dels futurs viatges abitats, una tòca que, per ara, es encara considerada coma una “mission complicada”.
 
 

 

Hello, world. My first look at my forever home. #CountdownToMarspic.twitter.com/dkM9jE9I6X

— NASA's Perseverance Mars Rover (@NASAPersevere) February 18, 2021