Las principalas vilas de Catalonha e lo País Valencian vivon dempuèi dimars passat de manifestacions nombrosas contra l’encarceracion del rapaire catalan, Pablo Hasél. Las protèstas s’acaban totjorn amb de rambalhs e de grèus afrontaments entre policièrs e manifestants. Tanben al Bascoat, a Madrid e endacòm mai i a agut de manifestacions de protèsta, mas gaireben sens rambalhs.
 
Lo rapaire l’arrestèron dimars passat, 16 de febrièr, d’ora de matin, a l’Universitat de Lhèida. Lo cantador s’èra embarrat dins l’Universitat de Lhèida, acompanhat d’una cinquantena de personas que lo sostenián. 
 
La justícia espanhòla a condemnat Pablo Hasél a 2 ans, 4 meses e 15 jorns d’empresonament per las paraulas de sas cançons e qualques tweets. Dins qualques unes, s’es mostrat partisan d’ÈTA o del GRAPO, d’organizacions terroristas, la primièra basca, l’autra espanhòla, ara desaparegudas, responsablas de la mòrt d’environ 800 e 30 personas respectivament. Pasmens, la senténcia dels jutges mençona mai que mai que lo rapaire qualifica de “mostres” las fòrças de seguretat de l’estat, que ditz “embriac, tiran e faissista” al rei emerit Joan Carles Ir e  que qualifica la familha reiala de “mafiosa e medievala” e de “parasits”.
 
Per sa defensa, lo rapaire assolida que pereu s’es mostrat en favor del Che Guevara, qu’es tanben responsable de mòrts. Mas sustot, met en question la legitimitat del jutjament car dos dels jutges del tribunal son pas brica imparcials: un foguèt decorat per la Gàrdia Civila e l’autre foguèt candidat del partit ultradrechista Falanja Espanhòla Independenta.
 
Tanben cal dire que fòrça causas que Hasél cantèt contra Joan Carles Ir son estadas verificadas dins d’enquistas posterioras fins al ponch que l’emerit a fugit l’estat espanhòl per evitar d’escàndols.
 
 
De marridas practicas policièras
 
Mentretant, las protèstas per carrièras son de mai en mai violentas. Dins lo primèr jorn, una gojata de 19 ans perdèt un uèlh a causa d’una bala esponja. Aquel fach provoquèt encara mai l’indignacion dels manifestants, car lo protocòl dels policièrs lor permet de tirar pas al dessús de l’abdomen amb aquò e los projectils d’aquela mena son de granda precision.
 
A mai, divèrses manifestants an denonciat de còps de matraca sul cap, que son tanplan enebits. De soslinhar lo deputat elegit de la CUP, Dani Cornellà, que foguèt matracat sul cap quand ensajava de negociar amb un policièr sus la detencion d’un manifestant.
 
 
Malèsser dels sindicats de policièrs
 
De lor caire, los sindicats dels Mòssis d’Esquadra an manifestat lor malèsser. “Farem un còrs ingovernable”, çò declarèt una associacion de policièrs que planhiá lo sosten popular als manifestants e sustot lo dels partits politics. Lo ministre regional (conselhièr) d’Interior de la Generalitat de Catalonha, Miquel Sàmper, diguèt que l’accion dels mòssis èra “inacceptabla”.
 
Pasmens, après s’amassar amb los representants de totes los sindicats de la polícia regionala catalana, Sàmper cambièt de discors e quitament justifiquèt l’accion policièra de dissabte dins lo quartièr de Gràcia, a Barcelona, una de las pus violentas que se remembre.
 
 
Manifestacion nazi a Madrid
 
Dins la meteissa setmana de l’encarceracion de Hasél se passèron qualques faches qu’an descadenat mai encara la colèra populara.
 
Dissabte 13 de febrièr, se tenguèt a Madrid una manifestacion d’ideologia nazi en omenatge a la Division Blava, un batalhon que Franco envièt a Hitler per l’ajudar pendent la Segonda Guèrra Mondiala. La polícia escortèt l’eveniment dins lo qual se diguèt d’eslogans antisemitas e en favor del faissisme. Las autoritats de Russia e d’Israèl se’n son indignadas.
 
 
Dos peses, doas mesuras
 
Diluns, a l’endeman de las eleccions regionalas ont l’independentisme aguèt sos resultats melhors de l’istòria, lo ministèri public tornava demandar l’embarrament total dels presonièrs politics independentistas. 
 
A mai, la television estatala, RTVE, licencièt un jornalista catalan per aver ofensat la familha reiala espanhòla mentre qu’a Linares (Andalosia), la polícia tirava de balas realas contra los manifestants que protestavan contra l’impunitat dels policièrs qu’avián tabasat, fòra de lor servici, un òme e sa filha davant la pòrta d’un bar.
 
De remembrar que los joves d’Altsasu (Bascoat) son encarcerats per terrorisme, tanben per una bagarra de bar.
 
 
L’estat espanhòl es lo qu’a mai d’artistas empresonats


L’estat espanhòl es lo qu’a mai d’artistas embarrats en preson, segon las donadas de 2019 que publiquèt l’an passat Freemuse, una organizacion internacionala que defend lo drech de liura expression artistica. Espanha es en tèsta del classament amb 14 artistas encarcerats, seguida d’Iran amb 13, de Turquia amb 9 e de Birmania amb 8. Freemuse analisèt 700 cases de tot lo Mond e identifiquèt un total de 71 artistas empresonats, la majoritat per “aver criticat lo govèrn”. Ça que la, per Freemuse, Espanha fa pas partida dels païses que mancan mai a la libertat d’expression, mas si França, los Estats Units e Turquia.


 
Marrit usatge de las leis antiterroristas


Dins son rapòrt, Freemuse explica que los artistas encarcerats dins l’estat espanhòl i son per “un marrit usatge de las leis antiterroristas”, e denóncia de “definicions ambigüas del terrorisme” que permeton a Espanha e a Turquia d’enseguir d’artistas.



 

Al vídeo no es veu bé , pero us ho explico jo: la gent encapsulada entre dos fronts ha aixecat les mans. No érem cap amenaça. I els mossos han començat a apallissar-nos per pur escarni, per humiliar i vexar. Al crit de "rojos de mierda" anaven pegant, sense deixar cap sortida. https://t.co/mapGFl1mcH

— Albert Arce (@Albert_arce) February 20, 2021

 

DIRECTE | Un grup d'encaputxats saquegen també diversos comerços del passeig de Gràcia

Segueix la protesta en #directebetevé, aquí  https://t.co/GqrSZdo5tzpic.twitter.com/IPER1Ke3hL

— btv notícies (@btvnoticies) February 20, 2021

 

Comissaria dels @mossos a Vic. Els agents han cantat 33 per emissora, que és el codi de màxima alerta per reclamar suport d'efectius davant d'una situació de perill. Desconec autor fotos. Els aldarulls contra la detenció de Hasel s'estenen per BCN, Lleida, Reus i Girona. pic.twitter.com/li97aTqSSY

— Anna Punsí (@punsix) February 16, 2021

 

Finalment ha perdut l'ull. El culpable hauria d'entrar a presó ara mateix, amb part dl govern. Això és una brutalitat. Tots sou responsables @mossos@govern@miquel_samperpic.twitter.com/EWUKUV9EJC

— Àvia Maria  (@aviamaria_) February 17, 2021

No sóc de BCN,he preguntat si Passeig de Gràcia i el Palau de la Música estaven a prop i m'han dit que no.Llavors això són faves comptades què hi feia el mateix pavo als 2 llocs? Aquest està pagat per les clavagueres de l'Estat @guardiacivil#UsTenimCalats#LlibertatPabloHaselpic.twitter.com/BLL9N7vMDg

— Montse Escarré  (@EscarreMontse) February 21, 2021

 

Los asistentes homenajearon a la División Azul, hicieron el saludo nazi y entonaron canciones de temática fascista en Madrid. “El judío es el culpable. El enemigo siempre va a ser el mismo”, decía una oradora.
Lo cuenta @Miquel_Rhttps://t.co/V7a7fdxHJTpic.twitter.com/wFrPwtWcnz

— La Marea (@lamarea_com) February 15, 2021

 

Se confirman las sospechas.

La Policía disparó fuego real contra ciudadanos en las movilizaciones de ayer en Linares.

El ministro Grande-Marlaska debe comparecer cuanto antes. https://t.co/rEw8Ou0ojd vía @abcdesevilla

— Jon Inarritu (@JonInarritu) February 14, 2021