Lo govèrn de la Nòva Caledònia a una majoritat independentista pel primièr còp dempuèi 1999, quand aquela institucion foguèt creada en vertut de l’Acòrdi de Nouméa de 1998. Sièis dels onze membres de l’executiu seràn de partits independentistas, après lo vòte que se tenguèt al Congrès canac lo 17 de febrièr passat, çò rapòrta Nationalia.
 
Lo cambiament de govèrn s’es produch après que, lo 2 de febrièr, las fòrças independentistas e autonomistas tombèron lo govèrn de Thierry Santa; demissionèron a causa de lor desacòrdi sus la venda d’una importanta usina de niquèl a una societat brasilièra.
 
Per l’eleccion pel primièr còp d’una majoritat independentista foguèron decisius los vòtes dels deputats del partit Lo Desvelh Oceanian, que representa los interèsses de la comunautat originària de las illas de Wallis e Futuna. Lo partit es pas independentista, mas en aquesta escasença s’es aliat amb lo Front de Liberacion Nacionala Canac e Socialista (FLNKS).
 
 
Marginalizacion de las femnas
 
Ça que la, lo nòu govèrn caledonian es compausat de dètz òmes e sonque una femna, çò qu’a entraïnat una manifestacion contra la marginalizacion de las femnas dins la politica insulara.