capçalera campanha

Actualitats

InternacionalPoliticaSocietat

Las filhas de Malcolm X demandan que se torne dobrir l’enquista sus son assassinat

Una letra postuma d’un èx-policièr demostrariá que la polícia de Nòva York conspirèt per tuar l’activista

| Marion S. Trikosko
Las filhas de l’activista afroamerican Malcolm Little, conegut coma Malcolm X, assassinat en 1965,  demandan que se torne dobrir l’enquista sus l’omicidi. Acompanhadas pels que foguèron avocats del militant, an dich dins una conferéncia de premsa qu’una nòva evidéncia soslinhava que la polícia de Nòva York e l’FBI aurián conspirat per tuar Malcolm X.
 
S’agís d'una letra de Raymond Wood, un èx-agent de la polícia de Nòva York. Dins una confession postuma l’èx-agent assegura que sos superiors lo quichèron per qu'obtenguèsse que dos dels òmes de seguretat de Malcolm X cometèsson de delictes qualques jorns abans lo murtre. L’arrestacion d’aqueles òmes auriá empedit qu’eles poguèsson acompanhar l’activista lo jorn que foguèt tuat. “Me diguèron qu’encoratgèsse los dirigents e de membres dels grops dels dreches civils a cometre de delictes”, çò detalha la letra, publicada per de mèdias estatsunidencs.
 
Lo procuraire de districte de Manhattan, Cyrus Vance, diguèt en febrièr de l’an passat que revisava l’afar en seguida d’un documentari de Netflix entitolat Qui tuèt Malcom X?, que metiá en causa que los dos condemnats foguèsson colpables. Ara, Vance a assegurat que la revision se trobava “activa e en cors”.
 
Malcom X foguèt atench per sèt balas quand èra a mand de far un discors dins la sala Audubon de Manhattan. Los jorns anteriors a l’assassinat, l’activista confessèt dins una entrevista que sospechava que de membres de la Nacion de l’Islam lo volián tuar, pr’amor qu’el aviá abandonat aquela organizacion dempuèi un an.
 
Tres òmes foguèron arrestats pel crime, e mai la familha e los partisans de Malcom X defendèsson totjorn que la polícia de Nòva York e l’FBI èran implicats. Pus tard se saupèt qu’abans de morir, Malcom X èra mes en examen per l’FBI per de presumits ligams amb lo comunisme.

 



 

 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

francesc palma
3.

Se matare Luter Kin, als dos Kennedy, a Marylin; que eran personas molt moderadas e estimadas per la majoria de la poblacion. Coma non avian de matar a Malcolm qu' era mai polèmic. La cia, l'FBI, Lo pentagon. Tots aquestes crims los encarregavan a la mafia. Mas segur solide que foren els los que encarregaren de fer o.

  • 1
  • 0
Nas de guit
2.

#1 "Unamerican activity".

  • 4
  • 0
Franc Bardòu
1.

"Pus tard se saupèt qu’abans de morir, l’FBI aviá mes examen Malcom X per de presumits ligams amb lo comunisme." E alavetz ? Es un delicte, d'èsser comunista o anarquista ?

  • 7
  • 1

Escriu un comentari sus aqueste article