Las marridas condicions de trabalh de Qatar son totjorn inquietantas. Non solament son al limit de l’esclavatge, mas tanben mai de 6750 obrièrs migrants son mòrts en trabalhant a la bastison de las infrastructuras de la copa del Mond de fotbòl 2022, çò rapòrta The Guardian. Segon de donadas fornidas pels païses d’origina de las victimas, la majoritat provenián d’Índia, de Nepal, de Paquistan, de Bangladèsh e de Sri Lanka. A mai, lo rapòrt assolida qu’aquelas donadas poiriá èsser encara pus nautas car se coneis pas las dels migrants d’autres païses coma las Filipinas e Kenya.
 
Qatar es a recrutar fòrça personal estrangièr per poder bastir sèt estadis monumentals e d’autres projèctes restacats a l’eveniment esportiu internacional, dont d’ostalariás, una nòva vila, un nòu aeropòrt, d’estradas, de transpòrts en comun...
 
Segon Amnestia Internacionala, las autoritats del país anoncièron de reformas per melhor protegir los dreches dels trabalhadors migrants, mas lor flaca mesa en òbra a per consequéncia que los migrants son pas, generalament, protegits contra los abuses e l’esplecha.
 
Lo govèrn qatari ditz que planh totas aquelas mòrts mas assegura que los emplegats recebon una atencion medicala gratuita. “Lo taus de mortalitat dins aquelas comunautats ten lo reng esperat en foncion de la talha e de la demografia de la populacion. Ça que la, cada vida perduda es una tragèdia, e estalviam pas nòstres esfòrces per ensajar de prevenir cada mòrt dins nòstre país”, çò ditz un comunicat l’executiu mençonat per The Guardian. 
 
De son costat, lo comitat organizaire de la Copa del Mond de fotbòl assegura qu’aquelas donadas son “inexactas”. Segons eles, an defuntat 37 obrièrs que bastissián las infrastructuras de l’eveniment, dont 34 son classats coma de mòrts “non restacadas al trabalh”.
 
Aquesta situacion es pas novèla en aquel país. Lo quite The Guardian avertissiá en 2014 qu’un obrièr immigrant morissiá cada dos jorns en Qatar. Una denóncia que la jonguèt Amnestia Internacionala.
 
 
Una interpretacion particulara de la kafala
 
Segon aquel rapòrt, la majoritat dels migrants i serián arribats amb l’argent prestat per d’agéncias d’emplec usurièras que prometián de salaris nauts qu’èran pas verais, lor confiscavan lo passapòrt e lor vida èra pas condicionada per las leis del país mas per la lei particulara de l’emplegaire segon una interpretacion particulara de la kafala. La kafala es, dins lo drech islamic, l’institucion que permet l’aculhiment legal dels enfants mas qu’en aquel cas es un truc legal per sometre los obrièrs immigrants al poder de l’emplegaire en marge de las leis del país d’origina.

 

Revealed: 6,500 migrant workers have died in Qatar as it gears up for World Cup https://t.co/ENKDyqmJqb

— The Guardian (@guardian) February 23, 2021