Lo primièr ministre britanic, David Cameron, a anonciat la convenença de far un referendum sus la relacion d’Euròpa amb lo Reialme Unit, que se debanarà entre 2015 e 2017. “Lo Reialme Unit es pas isolacionista, aperten a Euròpa, e volèm que contunhe dins l’Union Europèa, mas ne volèm melhorar tanben las condicions”, çò afirmèt lo primièr ministre, que faguèt un discors basat sul besonh de cambiar las relacions entre lo Reialme Unit e l’UE.

Pendent un discors prononciat dins lo sèti europèu de Bloomberg, al centre de Londres, Cameron soslinhèt que, se ganha las eleccions de 2015, convocarà un referendum per demandar als ciutadans se vòlon contunhar dins l’Union Europèa: “Es ora que los britanics se pronóncien, es ora que resolgam aquela question del Reialme Unit e d’Euròpa. Disi als britanics qu’aquò serà la vòstra decision”.
 
Cameron, que se definís coma “eurosceptic pragmatic”, diguèt qu’Euròpa non deu considerar los cambiaments necessaris coma una eretgia. Dins aquel encastre, lo Reialme Unit vòl contunhar dins l’UE, mas coma un sòci actiu, engatjat e competitiu.
 
Los principals partits de l’oposicion e los conservators europeïstas an avertit del perilh de sortir de l’UE, pr’amor que creson qu’aquò pòt crear d’incertitud e alonhar los investiments estrangièrs.