Aprèp la covid e sos variants: anglés, sud-african, brasilièr, vaquí lo virus occitan. Aiceste marcha a l’envèrs dels autres. Es a dire que fa pas de malauts e los manda pas a l’espital. El, ne ven de l’espital. Lo virus occitan ven de quitar la reanimacion ont se trobava dempuèi d’annadas e d’annadas per sonhar los malauts e portar prodèl als occitans. 
 
La sola tòca d’aquel virus occitan es de botar las femnas e òmes d’Occitània en santats culturala e lingüistica plenas. Podètz pas saber la descobèrta que foguèt pels primièrs contaminats de poder charrar dins lor lenga. Sens parlar d’aqueles qu’avián just l’accent del país coma d’aqueles que barjacavan just qualques mots. Sens oblidar los de tota la planeta qu’avián enveja d’aprene l’occitan. Un còp virussats, pòdon charrar coma o farián dins d’autras lengas. La demanda de virus es de mai en mai fòrta.
 
Aquel virus, se rassegura los occitans, espauruga lo govèrn francés que se demanda cossí luchar contra aquela pandemia generalizada novèla. Lo President, coma lo ministre de la santat, avián pas jamai poscut soscar qu’un jorn aquel virus posquèsse espelir e s’espandir aital. Lo ministre de l’educacion nacionala, espaurugat per l’espelida del variant occitan qu’enriquís lo país, a paur que d’autres grelhen coma lo virus catalan, arpitan, breton ,còrse, alsacian... 
 
Pena perduda se qualques se personas volrián far vaccinar. Lo virus occitan fa de resisténcia. Resistís al vaccin. Amb el pas la pena de cargar la masqueta. Practica lo boca a boca. Per lo crocar, es aconselhat de se sarrar los unes dels autres, de charrrar, de s’abraçar e de se potonejar. Las salas grandas coma pichonas previstas per la vaccinacion devenon, del calabrun a l’alba, salas de las fèstas pels balètis, teatre, cants e danças. 
 
Venèm d’aprene que totas e totes los ensenhaires de lenga d’òc manifèstan per pregar lo virus occitan de s’espandir dins totas las escòlas, collègis, licèus e universitats. Demandan qu’aiceste siá mai actiu que çò qu’es a l’ora d’ara. Dos o tres contaminats per classa lor sufís pas, vòlon que totas e totes sián virussats al pus lèu! Per ara, las estatisticas son pro encoratjantas. Sèm passats en un mes del tres per cent al trenta per cent. Demòra, de segur, un camin long de far per contaminar tota la populacion. 
 
Seguissèm minuta per minuta l’avançada d’aquela pandemia novèla e manquarem pas de vos téner al fial de la seguida dels eveniments que, fin finala, trebolan las autoritats belcòp mai que la covid.
 
Mèfi! Se legissètz aqueste article es que sètz pertocat pel virus occitan!
 
 
 
 
Clamenç
Umorista de lenga occitanaç
 
 
                 
                        
            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.