Aqueste dissabte es sus la pelena de l’estadi Giral a Perpinhan que los Dragons Catalans rescontraràn una seleccion dels melhors jogaires d’Elèit 1: lo XIII del President. Perqué pas a Brutus? Per çò que los Dragons an mes l’estadi a disposicion de l’esquipa de fotbòl de Canet que reçaup l’OM en Copa de França.

22 jogaires son seleccionats per aquesta revista d’efectiu en vista de la Copa del Mond  de la tardor. Sols, los Orses de Sent Gaudenç an pas de seleccionat alara que Carcassona ne compta 5.
 
Un cambiament bèl es intervengut a la direccion de las esquipas de França. Es per un comunicat aqueste diluns 22 de febrièr que la Federacion oficializava la mesa a l’escart d’Aurelian Cologni que deviá dirigir los Pols fins a la Copa del Mond. Per lo remplaçar, nominacion de Laurenç Fraissinós amb l’entraïnaire dels Roosters Trent Robinson per ajudar. Dempuèi l’autra part de la planeta, va èsser un pauc complicat…
 
La direccion del XIII femenin es balhada a Vincenç Balop. Es totjorn jos la responsabilitat de Silvan Crismanovitch e Laurenç Dupuy que lo XIII Cadieral ensajarà de servar sa corona mondiala.
 
Òm es en dreit de se pausar de questions sus aqueles cambiaments abans la fin d’un cicle coma sus la mesa a l’escart d’un tecnician reconegut, Joan-Francés Albèrt a la direccion de las seleccions juniors. Semblariá que los discorses preelectorals d’union generala aguèsson daissat plaça a de cambiaments per cambiar e a de reglaments de comptes gaire glorioses. Damatge…
 
 
Elèit 1: Los Canaris, mèstres de Brutus
 
Dissabte, èra sus la pelena de Brutus que los Dragonets recebián los Canaris per un duèl del cap de classament. Los carcassoneses marquèron sus la primièra accion, puèi l’alièr Escamillà interceptèt una pauma qu’anèt pausar entre los pals aprèp nonanta mèstres d’escapada. A la pausa, los vesitaires menavan 16-6.
 
A la represa, en inferioritat numerica (carton jaune), los catalans tornavan a egalitat. Una penalitat e un ensag collectiu permetiá als Canaris de tornar menar 22-16 mas los Sang e Aur tornavan un còp de mai abans de prene l’avantatge mercé a una penalitat. Caliá una polida ataca classica amb passa crosada a la clau per permetre als audencs de puntar l’ensag de la victòria: 28-24. Amb un jòc ritmat e una capacitat bèla d’adaptacion a las situacions de jòc, los joves Dragonets pausèron de serioses problèmas a de Canaris que comptavan sus l’espròva de fòrça prepausada per sos davants. Mas a la fin de la partida, es lo Canarí que canturleja!
 
Avinhon mostrèt qu’èra la formacion en forma del moment en estrilhant Vilanòva: 40-10. Meteissa sancion per St Gaudenç, qu’es pas brica dins lo còp, a Albi: desfaita 40-12.
 
Dimenge, partida amb suspens al Molin. Los locals fan plan de fautas. A la fin del primièr temps, la còrna restontís mas Limós marca un ensag sus una relança de 80 mètres. Limós contunha de faire la corsa en cap. L’FCL vòl pas plegar e torna a 2 punts: 24-26. Los vesitaires son privats de lor capitani per las darrièras dètz minutas (carton jaune) e l’arrièr limosenc Santo torna marcar… aprèp la còrna: victòria dels Grizlis 32-24! A Palau, fàcia a Tolosa, los Bròncos signan (enfin) lor primièra victòria de la sason e, coma fan pas dins la mièja mesura, ganhan amb una larga diferéncia: 37-18 e daissan la darrièra plaça al classament a Sent Gaudenç!
 
 
Sequéncia de nostalgia
 
Podètz escotar aquesta cançon d’Enric de Villerouge, aqueste imne al XIII, que passava dins los estadis abans las partidas o al moment de la pausa a la debuta dels ans 1960:
 

 
 
 
 
Alan Roch