capçalera campanha

Actualitats

Internacional

Afganistan: tres jornalistas assassinadas pel terrorisme jihadista

Lo país patís dempuèi qualques meses una avalanca d’atacas masclistas contra de politicianas, jornalistas e intellectualas

Tres femnas mòrtas e doas autras nafradas es lo tragic bilanç d’una ataca jihadista contra de femnas jornalistas dimars passat a Jalalabat, en Afganistan. Trabalhavan per la television publica del país e l’autoproclamat Estat Islamic a revendicat lo crime. Justifican l’assassinat per doas rasons: accèptan pas que las femnas trabalhen e considèran que lo mèdia es leial al “govèrn apostata”.
 
Las tres victimas presentavan de programas a la television e fasián tanben de doblatges per la cadena Enikas TV; un mèdia important que cobrís las províncias de Nangarhar, Laghman e Kunar. En decembre, una autra salariada d’Enikas TV foguèt assassinada.
 
Afganistan patís dempuèi qualques meses una avalanca d’atacas masclistas contra de femnas politicianas, jornalistas, intellectualas... tanben doas jutgessas foguèron tuadas en genièr passat.
 
 
De convèrsas de patz que capitan mal?
 
S’agís de l’enena ataca terrotista, cinc meses après que comencèron las convèrsas dirèctas de patz entre lo govèrn d’Afganistan e los representants del grop paramilitar fondamentalista islamic dels talibans; aquelas convèrsas s’entamenèron lo 15 de setembre a Al Dawha (Qatar) jos la mediacion dels Estats Units. La tòca es de metre lo ponch final a gaireben dos decennis de guèrra.
 
Dins aquelas negociacions, l’objectiu principal del govèrn afgan es la declaracion d’una alta al fuòc permanenta, mas los talibans afortisson que per eles, combatre l’administracion de Kabol, establida pels “invasors” estatsunidencs, fa partida d’una guèrra qu’arrestaràn pas.

 
 




abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palma
1.

Compreni qu'aquestes cap de favas ignorants fasan aquestas causas, los integristas coma los nazis son uns desletrats que s' an anat a l'escola a estat per enfoter s'en de l'educacion. Uns folhs criminals.

  • 0
  • 0

Escriu un comentari sus aqueste article