capçalera campanha

Actualitats

InternacionalPoliticaSocietat

Àngel, la filha de 19 ans tuada per las balas qu’es venguda un simbòl de las protèstas en Birmania

Son estrambòrd dins las manifestacions foguèt enregistrat en vidèo fins que foguèsse tuada per las carrièras de Mandalay, la segonda vila del país

En Birmania, ni lo blocatge d’internet, ni l’assassinat indiscriminat dels manifestants per las balas de la polícia e de l’armada capitan pas d’arrestar las protèstas contra lo còp d’estat. Demest las victimas, una filha de 19 ans es venguda un simbòl d’aquelas protèstas. Se nomenava Kyal Sin e li an donat l’escais d’Àngel. Èra dançaira e campiona de taekwondo. Son estrambòrd dins las manifestacions foguèt enregistrat en vidèo fins que foguèsse tuada per las carrièras de Mandalay, la segonda vila del país.
 
Una amiga siá explicava a Reuters qu’Àngel aviá protegit d’autres manifestants dels gases lacrimogèns e de las fusilhadas. Pauc abans d’èsser tuada se pòt ausir dins un vidèo coma crida: “Corram pas, cal pas escampar de sang!”.
 
Sas funeralhas foguèron massissament seguidas. Kyal Sin, chafrada Àngel, es venguda un simbòl nacional de las protèstas.
 
 
Almens 54 manifestants mòrts
 
Segon las darrièras informacions que nos son arribadas a la redaccion, las fòrças de l’òrdre an tuat almens 54 manifestants. Los nafrats se comptan per centenats. A mai, i auriá mai de 1500 personas arrestadas, dont de politicians, d’activistas, de jornalistas e de monges.
 
Aung San Suu Kyi, a l’edat de 75 ans, rèsta embarrada dins un regim d’isolament dempuèi lo còp d’estat del 1r de febrièr passat. L’arrestèron amb d’autres dirigents del partit al govèrn del temps que l’armada preniá lo poder e declarava l’estat d’urgéncia en tot acusar de frauda las eleccions legislativas de novembre passat. Lo putsch lo faguèron lo meteis jorn que se deviá constituir lo parlament sortit de las eleccions del 8 novembre amb una Aung San Suu Kyi plan refortida. La cap birmana e son partit istoric d’oposicion a la dictatura aviá ganhat clarament las eleccions vistas coma un referendum sus la gestion del govèrn de la filha del paire de l’independéncia birmana.
 

 
 
 



abonar los amics de Jornalet

 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

francesc palma
1.

Mas los criminals mai ganhan. Un dia pagaran los crims qu' an fait aquesta femada de raça de viboras, indignas de ser nomenada raça umana.

  • 1
  • 0

Escriu un comentari sus aqueste article